नांदेड (प्रतिनिधी) :
तालुका क्रीडासंकुल, किनवट येथे फेब्रुवारी महिन्यात घडलेल्या क्रीडा साहित्य चोरीच्या गंभीर घटनेनंतरही संबंधित यंत्रणेकडून कोणतीही ठोस कारवाई न झाल्याने नाराजी व्यक्त होत आहे. या प्रकरणी तात्काळ चौकशी करून दोषींवर कठोर कारवाई करण्यात यावी, अशी मागणी सामाजिक कार्यकर्ते बबन वानखेडे यांनी केली आहे.
मिळालेल्या माहितीनुसार, दि. २ फेब्रुवारी २०२६ रोजी रात्री ते ३ फेब्रुवारीच्या पहाटे दरम्यान अज्ञात चोरट्यांनी क्रीडासंकुलातील बंद खोलीचे कुलूप तोडून मोठ्या प्रमाणात क्रीडा साहित्याची चोरी केली. या घटनेत टेनिस बॉल, मेडिसिन बॉल, हँडबॉल, क्रिकेट किट, बॅट्स, स्टंप्स, कॅरम बोर्ड, बास्केटबॉल आदी साहित्याचा समावेश असून सुमारे १.५ लाख रुपयांचे नुकसान झाल्याचे समोर आले आहे.
या घटनेनंतर दि. ३ फेब्रुवारी २०२६ रोजी पोलिस ठाणे किनवट येथे अधिकृत तक्रार दाखल करण्यात आली होती. मात्र तीन महिन्यांहून अधिक कालावधी उलटूनही या प्रकरणात कोणतीही ठोस चौकशी किंवा आरोपींचा शोध लागलेला नाही. त्यामुळे पोलिस प्रशासनाच्या कार्यपद्धतीवर प्रश्नचिन्ह निर्माण झाले आहे.
दरम्यान, दि. २४ मे २०२६ रोजी पुन्हा निवेदन देत या प्रकरणाची गंभीर दखल घेऊन तात्काळ चौकशी सुरू करावी, दोषींना शोधून कठोर कारवाई करावी तसेच चोरी गेलेले साहित्य परत मिळवून द्यावे, अशी ठाम मागणी करण्यात आली आहे.
बबन वानखेडे यांनी नमूद केले आहे की, ही घटना केवळ चोरी नसून सार्वजनिक व शासकीय मालमत्तेचे मोठे नुकसान करणारी आहे. त्यामुळे प्रशासनाने याकडे गांभीर्याने लक्ष देणे गरजेचे आहे.
कारवाईची प्रतीक्षा :
या घटनेमुळे क्रीडाप्रेमी व स्थानिक नागरिकांमध्ये असंतोषाचे वातावरण असून, लवकर कारवाई न झाल्यास तीव्र आंदोलन छेडण्याचा इशाराही देण्यात आला आहे.
