आष्टी | प्रतिनिधी | दि. 25 मे
दुचाकीवरून येत नागरिकांच्या गळ्यातील सोनसाखळ्या हिसकावून परिसरात दहशत निर्माण करणाऱ्या दोन चोरट्यांना स्थानिक गुन्हे शाखा आणि आष्टी पोलिसांनी संयुक्त कारवाई करत जेरबंद केले आहे.
मिळालेल्या माहितीनुसार, 30 एप्रिल रोजी आष्टी परिसरात एक व्यक्ती पायी जात असताना दुचाकीवरून आलेल्या दोन अज्ञात चोरट्यांनी त्याच्या गळ्यातील सोनसाखळी हिसकावून पळ काढला होता. या प्रकरणी आष्टी पोलीस ठाण्यात गुन्हा दाखल करण्यात आला होता. त्याच दिवशी अशाच प्रकारच्या आणखी दोन घटना घडल्याने पोलिसांसमोर मोठे आव्हान उभे राहिले होते.
स्थानिक गुन्हे शाखेने या प्रकरणाचा समांतर तपास सुरू करत 25 पेक्षा अधिक गुन्हेगार वस्त्यांची पडताळणी, हिस्ट्रीशीटरांची चौकशी तसेच 100 हून अधिक सीसीटीव्ही फुटेज तपासले. तपासादरम्यान संशयितांच्या हालचालींचा मागोवा घेत गुप्त माहितीच्या आधारे पोलिसांनी विकास गडया भोसले (वय 22, रा. चिखली, ता. आष्टी) याला ताब्यात घेतले.
चौकशीत त्याने आपल्या साथीदार अरुण बष्णा काळे (वय 23, रा. बोलेगाव, ता. गंगापूर, जि. छत्रपती संभाजीनगर) याच्यासह गुन्हा केल्याची कबुली दिली. दोन्ही आरोपींनी बीड जिल्ह्यातील किमान तीन सोनसाखळी चोरीच्या घटनांमध्ये सहभाग असल्याची प्राथमिक कबुली दिली आहे.
या प्रकरणाचा पुढील तपास सुरू असून आणखी गुन्हे उघड होण्याची शक्यता पोलिसांनी व्यक्त केली आहे.
ही कारवाई पोलीस अधीक्षक नवनीत काँवत, पोलीस उपअधीक्षक बाळकृष्ण हनपुडे पाटील, स्थानिक गुन्हे शाखा पोलीस निरीक्षक शिवाजी बंटेवाड, तसेच आष्टी पोलीस ठाण्याचे पोलीस निरीक्षक शरद भुतेकर यांच्या मार्गदर्शनाखाली करण्यात आली.
