जळकोट : जळकोट येथील धुळशेट्टे नागनाय उपप्राचार्य यांच्या मालकीच्या म्हशीला अचानक गंभीर आजाराचा त्रास निर्माण झाला होता. म्हशीचे आतडे बाहेर येण्याची गंभीर परिस्थिती निर्माण झाल्याने शेतकरी कुटुंबात चिंतेचे वातावरण पसरले होते. वेळेत योग्य उपचार न झाल्यास संबंधित म्हशीचा जीव जाण्याची शक्यता निर्माण झाली होती. सदर म्हैस अंदाजे एक लाख पंचाहत्तर हजार रुपये किमतीची असल्याने शेतकऱ्यांचे मोठे आर्थिक नुकसान होण्याची भीती व्यक्त केली जात होती.
घटनेची माहिती मिळताच पशुवैद्यकीय अधिकारी Dr. Kalvale यांनी तातडीने घटनास्थळी धाव घेतली. त्यांनी अत्यंत कौशल्याने आणि तत्परतेने म्हशीवर आवश्यक औषधोपचार केले. योग्य उपचार आणि काळजीमुळे म्हशीची प्रकृती स्थिर झाली असून तिला जीवदान मिळाले आहे.
यावेळी उपस्थित नागरिकांनी डॉ. कलवले यांच्या कार्याचे कौतुक करत “पशु सेवा हीच ईश्वर सेवा” असल्याची भावना व्यक्त केली. ग्रामीण भागात पशुधन हे शेतकऱ्यांचे मोठे आर्थिक आधारस्तंभ असते. अशा परिस्थितीत वेळेत उपचार मिळाल्यामुळे शेतकऱ्यांचे मोठे नुकसान टळले असल्याचे सांगण्यात आले.
धुळशेट्टे नागनाय यांनीही पशुवैद्यकीय अधिकाऱ्यांचे आभार मानत, योग्य वेळी उपचार मिळाल्यामुळे आपल्या म्हशीचा जीव वाचल्याचे सांगितले. या घटनेमुळे परिसरात पशुवैद्यकीय सेवेबद्दल समाधान व्यक्त करण्यात येत आहे.
