मौजे बाजार वायगाव / प्रतिनिधी
मौजे बाजार वायगाव येथे दिनांक २६ मे २०२६ रोजी लोकवर्गणीतून उभारण्यात आलेल्या “ज्ञानांकुर अभ्यासिकेचे” उद्घाटन जालना जिल्हा परिषदेचे मुख्य कार्यकारी अधिकारी मा. डॉ. कृष्णकांत कनवरिया (IAS) यांच्या हस्ते मोठ्या उत्साहात आणि दिमाखात संपन्न झाले.
साहेबांच्या आगमनावेळी ग्रामस्थांच्या वतीने पुष्पगुच्छ देऊन त्यांचे स्वागत करण्यात आले. तसेच विद्यार्थिनींनी पारंपरिक पद्धतीने औक्षण करून त्यांचे स्वागत केले. यानंतर मा. डॉ. कनवरिया यांनी छत्रपती शिवाजी महाराज यांच्या अश्वारूढ पुतळ्यास तसेच भारतरत्न डॉ. बाबासाहेब आंबेडकर यांच्या पुतळ्यास पुष्पहार अर्पण करून अभिवादन केले. त्यानंतर अभ्यासिकेच्या दालनाचे रिबीन कापून विधिवत उद्घाटन करण्यात आले.
यानंतर मुख्य कार्यक्रम भव्य विचारमंचावर पार पडला. यावेळी डॉ. कृष्णकांत कनवरिया यांनी गावातील अभ्यासिका समिती, विद्यार्थ्यांचे प्रयत्न आणि ग्रामस्थांच्या लोकसहभागाचे मनापासून कौतुक केले. त्यांनी आपल्या जीवनप्रवासाविषयी विद्यार्थ्यांना सविस्तर माहिती देत प्रेरणादायी मार्गदर्शन केले. विद्यार्थ्यांच्या विविध प्रश्नांची उत्तरे देत त्यांच्याशी संवाद साधला तसेच पालकांशीही चर्चा केली.
विशेष म्हणजे “अभ्यासिका” हा त्यांच्या मनातील पायलट प्रोजेक्ट असल्याचे त्यांनी सांगितले. गावातील नागरिकांनी लोकवर्गणीतून ही अभ्यासिका उभारल्याबद्दल त्यांनी सर्व ग्रामस्थांचे अभिनंदन केले. विद्यार्थ्यांना सातत्याने अभ्यास करण्यासाठी प्रेरित करत अभ्यासिका अधिक प्रभावी आणि यशस्वीपणे चालविण्यासाठी आवश्यक सूचना देखील त्यांनी दिल्या.
कार्यक्रमादरम्यान अभ्यासिकेसाठी परिश्रम घेणाऱ्या सर्व सदस्यांचा पुष्पगुच्छ देऊन सत्कार करण्यात आला. हा कार्यक्रम यशस्वी होण्यासाठी अभ्यासिका समिती, गावातील भूमिपुत्र शिक्षक तसेच सर्व ग्रामस्थांनी विशेष परिश्रम घेतले. संपूर्ण कार्यक्रम उत्साहपूर्ण आणि प्रेरणादायी वातावरणात संपन्न झाला.
