फलटणसाठी मोठी घोषणा अतिरिक्त एमआयडीसीला हिरवा कंदील; बूथ अध्यक्षांना शिवसेनेची पूर्ण ताकद – उदय सामंत
प्रतिनिधी निकेश भिसे
दि. 27 जून 2026
फलटण : सातारा जिल्ह्यातील फलटणसाठी मोठी आणि महत्त्वाची घोषणा करण्यात आली असून, फलटणमध्ये अतिरिक्त एमआयडीसी उभारण्याच्या मागणीला अखेर हिरवा कंदील मिळाला आहे. विधान परिषदेचे आमदार श्रीमंत रामराजे नाईक निंबाळकर यांच्या सातत्यपूर्ण पाठपुराव्यानंतर उपमुख्यमंत्री एकनाथ शिंदे यांनी सकारात्मक निर्णय घेतल्याची माहिती राज्याचे उद्योगमंत्री उदय सामंत यांनी दिली.
फलटण येथे आयोजित २५५ फलटण-कोरेगाव विधानसभा मतदारसंघ पदाधिकारी निवड आढावा, BL-2 नोंदणी अभियान तसेच फलटण नगर परिषद, जिल्हा परिषद व पंचायत समिती निवडणुकीत विजयी झालेल्या सदस्यांच्या सत्कार समारंभात ते बोलत होते.
एकनाथ शिंदे यांचा शब्द म्हणजे काळ्या दगडावरची भगवी रेष, असे सांगत उदय सामंत यांनी फलटणमध्ये अतिरिक्त एमआयडीसी उभारण्याचे काम निश्चित पूर्ण होणार असल्याचा विश्वास व्यक्त केला. या घोषणेमुळे फलटण परिसरातील औद्योगिक विकासाला मोठी चालना मिळणार असल्याचे मानले जात आहे.
यावेळी त्यांनी फलटणमध्ये कार्यरत असलेल्या जगातील तिसऱ्या क्रमांकाच्या पोटॅशियम उत्पादक कंपनीचाही उल्लेख केला. राज्य सरकार या कंपनीला सर्वतोपरी सहकार्य करणार असून, भविष्यात राज्यातील इतर एमआयडीसी क्षेत्रात विस्तारासाठी जागा आवश्यक असल्यास ती प्राधान्याने उपलब्ध करून दिली जाईल, असेही त्यांनी स्पष्ट केले.
कार्यक्रमात बोलताना उदय सामंत यांनी शिवसेना संघटनेच्या ताकदीवर विशेष भर दिला.
शिवसेनेचे पदाधिकारी आमदार, खासदार आणि मंत्र्यांनाही हक्काने आदेश देऊ शकतात.असे सांगत त्यांनी तळागाळातील कार्यकर्त्यांच्या भूमिकेचे महत्त्व अधोरेखित केले.
शिवसेना जिल्हाध्यक्षांनी आमदार किंवा मंत्र्यांच्या गाडीचे दरवाजे उघडण्याचे काम करू नये. धर्मवीर आनंद दिघे आणि उपमुख्यमंत्री एकनाथ शिंदे यांच्यासारखा दरारा निर्माण करा. असे आवाहनही त्यांनी केले.
पक्ष संघटनेतील बूथ अध्यक्षांबाबत मोठी घोषणा करताना उदय सामंत म्हणाले, बूथ अध्यक्षाला शिवसेनेची पूर्ण ताकद आणि संरक्षण दिले जाईल. असा शब्द उपमुख्यमंत्री एकनाथ शिंदे यांनी दिला आहे. त्यामुळे आगामी स्थानिक स्वराज्य संस्थांच्या निवडणुकांच्या पार्श्वभूमीवर शिवसेना अधिक आक्रमकपणे मैदानात उतरणार असल्याचे संकेत मिळत आहेत.
भाषणादरम्यान उदय सामंत यांनी
माजी पंतप्रधान अटल बिहारी वाजपेयी आणि ज्येष्ठ नेते शरद पवार यांनीदेखील शिवसेनेच्या शाखा रचनेतून प्रेरणा घेत पक्षविस्तार केल्याचा उल्लेख केला.
दरम्यान कार्यक्रमात उपस्थित कार्यकर्त्यांनी
श्रीमंत संजीवराजे नाईक निंबाळकर यांना आमदार करा अशा जोरदार घोषणा दिल्याने सभा दणाणून गेले. त्यावर प्रतिक्रिया देताना उदय सामंत म्हणाले, जे माझ्या हातात नाही त्याची जबाबदारी मी घेणार नाही. मात्र कार्यकर्त्यांची भावना पक्षप्रमुख एकनाथ शिंदे साहेबांपर्यंत पोहोचवण्याची जबाबदारी मी आणि माजी खासदार राहुल शेवाळे स्वीकारत आहोत.
या वक्तव्यानंतर उपस्थितांनी टाळ्यांच्या कडकडाटात प्रतिसाद दिला. कार्यक्रमाच्या शेवटी राज्यसभा खासदार ज्योती वाघमारे, राहुल शेवाळे, चंद्रहार पाटील आणि उदय सामंत यांच्या हस्ते जिल्हा परिषद, पंचायत समिती आणि फलटण नगरपालिका निवडणुकीत विजयी झालेल्या नवनिर्वाचित सदस्यांचा सत्कार करण्यात आला.
