हर्णे मारहाण प्रकरणी कलम ३०७ अंतर्गत गुन्हा दाखल; आरोपी ताब्यात, अफवांपासून दूर राहण्याचे आवाहन
दापोली | प्रतिनिधी
दिनांक : २८ मे २०२६
दापोली तालुक्यातील हर्णे येथे घडलेल्या मारहाण प्रकरणी भारतीय दंड संहितेच्या कलम ३०७ अंतर्गत गुन्हा दाखल करण्यात आला असून संबंधित आरोपींना पोलिसांनी ताब्यात घेतल्याची माहिती समोर आली आहे.
या प्रकरणाबाबत माहिती देताना रत्नागिरीचे अप्पर पोलीस अधीक्षक बी.बी. महामुनी यांनी सांगितले की, “हर्णे येथील घटनेप्रकरणी कलम ३०७ अंतर्गत गुन्हा नोंद करण्यात आला आहे.
संबंधित आरोपींना ताब्यात घेण्यात आले असून पुढील कायदेशीर प्रक्रिया सुरू आहे.”
दरम्यान, घटनेनंतर दापोली तालुक्यात निर्माण झालेल्या तणावाच्या पार्श्वभूमीवर पोलिस प्रशासन सतर्क झाले असून संपूर्ण परिसरात कडक बंदोबस्त ठेवण्यात आला आहे.
“दापोली तालुक्यात सध्या शांतता व सुव्यवस्था अबाधित आहे. नागरिकांनी कोणत्याही अफवांवर विश्वास ठेवू नये तसेच अफवा पसरवू नयेत,” असे आवाहनही अप्पर पोलीस अधीक्षक बी.बी. महामुनी यांनी केले.
पोलिसांकडून सोशल मीडियावरही लक्ष ठेवण्यात येत असून नागरिकांनी जबाबदारीने वागावे, असे प्रशासनाने स्पष्ट केले आहे.
