प्रतिनिधी आष्टी : तालुक्यात मनरेगा, वैयक्तिक घरकुल, विहीर, शेततळे, शेळी पालन शेड लाभार्थ्यांच्या हक्काचे मस्टर काढण्याऐवजी, ३५० बोगस रस्त्याची कामे दाखवून मस्टर काढण्याचा प्रकार सुरू असल्याने पात्र लाभार्थ्यांवर अन्याय होत आहे.
घरकुल योजनांतर्गत लाभार्थ्यांना घर बांधण्यासाठी मनरेगातून मंजुरी स्वरूपात मस्टर मिळणे अपेक्षित असते. परंतु प्रशासनाकडून दिरंगाई होत असून, केवळ कागदोपत्री दाखवलेल्या रस्त्यांच्या कामांचे फोटो सादर करून कोट्यवधी रुपयांचे मस्टर घाईघाईने मंजूर केल्याचा आरोप होत आहे. खऱ्या मजुरांना व घरकुल लाभार्थ्यांना त्यांच्या हक्काच्या निधीपासून वंचित राहावे लागत आहे. सर्व प्रकरणाची सखोल चौकशी करून दोषींवर कठोर कारवाई करावी, घरकुल लाभार्थ्यांचे थकीत मस्टर तत्काळ मंजूर करावेत, अशी मागणी नागरिकांनी जिल्हाधिकारी व जिल्हा परिषदेच्या मुख्य कार्यकारी अधिकाऱ्यांकडे केली आहे.
