उरण पोलीस ठाण्यात वकिलांशी गैरवर्तन; PSI वर कारवाईची मागणी
उरण : उरण वकील संघटनेचे सदस्य तथा वकील श्री. गोविंदा नरेश घरत हे फिर्यादीसोबत मदतीसाठी उरण पोलीस ठाण्यात गेले असता, फिर्यादीच्या म्हणण्यानुसार जबाब घेण्यासंदर्भात पोलीस उपनिरीक्षक (PSI) निलेश विठ्ठल कोंडलकर यांच्याशी चर्चा झाली. यावेळी PSI कोंडलकर यांनी वकील घरत यांच्याशी अयोग्य भाषेत बोलून अपमानास्पद वर्तन केल्याचा आरोप करण्यात आला आहे. तसेच त्यांना धक्काबुक्की करून पोलीस ठाण्यातून बाहेर काढल्याचेही सांगण्यात येत आहे.
या घटनेमुळे वकील वर्गात संतापाचे वातावरण निर्माण झाले असून, महाराष्ट्रातील विविध पोलीस ठाण्यांमध्ये वकिलांशी अशा प्रकारचे गैरवर्तन होत असल्याचा आरोप करण्यात येत आहे. मात्र संबंधित अधिकाऱ्यांवर कोणतीही ठोस कारवाई होत नसल्याची खंत व्यक्त केली जात आहे.
दरम्यान, महाराष्ट्र राज्य पोलीस महासंचालक यांनी या प्रकरणाची गंभीर दखल घेऊन PSI निलेश विठ्ठल कोंडलकर यांना तात्काळ निलंबित करून कायदेशीर कारवाई करावी, अशी मागणी करण्यात आली आहे. तसेच राज्याचे गृहमंत्री देवेंद्र फडणवीस यांनीही या प्रकरणात लक्ष घालावे, अशी मागणी वकील संघटनांकडून करण्यात येत आहे.
