वाकी नदीकाठावर अवैध हातभट्टी दारू अड्ड्यावर पोलिसांचा छापा; 45 हजारांचा मुद्देमाल जप्त.
शहादा,दि.31(का.प्र.)
म्हसावद पोलीस ठाण्याच्या पथकाने अवैध दारू विक्रेत्यांविरुद्ध धडक मोहीम उघडली आहे. फत्तेपूर गावाजवळील वाकी नदीच्या किनारी झाडीझुडपांच्या आडोशाला सुरू असलेल्या अवैध हातभट्टी दारू निर्मिती अड्ड्यावर पोलिसांनी छापा टाकला. या कारवाईत सुमारे 45 हजार रुपयांचा मुद्देमाल जप्त करण्यात आला असून, एका संशयिताविरुद्ध गुन्हा दाखल करण्यात आला आहे.
दि.30 मे रोजी दुपारी 2 वाजेच्या सुमारास फत्तेपूर (ता. शहादा) गावाजवळील वाकी नदीच्या किनारी काटेरी झाडे व झुडपांच्या आडोशाला अवैधरित्या गावठी हातभट्टीची दारू तयार केली जात असल्याची गुप्त माहिती सहाय्यक पोलीस निरीक्षक रमेश वावरे यांना मिळाली होती. माहिती मिळताच स.पो.नि. वावरे यांनी पथकासह तात्काळ घटनास्थळी धाव घेत सापळा रचला आणि अचानक छापा टाकला.या छाप्यात पोलिसांनी विकास सत्या ठाकरे (वय 27, रा. फत्तेपूर, ता. शहादा, जि. नंदुरबार) या संशयिताला ताब्यात घेतले. त्याच्या ताब्यातून दारू निर्मितीसाठी
वापरण्यात येणारे साहित्य आणि तयार हातभट्टीची दारू जप्त करण्यात आली.कारवाईत 10 लोखंडी ड्रम 8 मोटारींच्या ट्यूबमध्ये भरलेली सुमारे 400 लिटर गावठी दारू,दारू गाळण्यासाठी वापरण्यात येणारे १० प्लास्टिकचे पाईप असा एकूण अंदाजे किंमत 45 हजार रुपये किंमतीचा मुद्देमाल जप्त करण्यात आला.याप्रकरणी पोलीस शिपाई मुकेश ओंकारसिंग राठोड यांनी दिलेल्या फिर्यादीवरून म्हसावद पोलीस ठाण्यात संशयित विकास ठाकरे याच्याविरुद्ध महाराष्ट्र दारूबंदी कायदा कलम 65(ई) प्रमाणे गुन्हा दाखल करण्यात आला आहे.सदर कारवाई म्हसावद पोलीस ठाण्याचे सहाय्यक पोलीस निरीक्षक रमेश वावरे यांच्या मार्गदर्शनाखाली करण्यात आली असून, या घटनेचा पुढील तपास सपोनि विठ्ठल पावरा हे करीत आहेत.म्हसावद पोलिसांनी अवैध हातभट्टी दारू निर्मिती आणि विक्री करणाऱ्यांविरोधात अत्यंत आक्रमक पवित्रा घेतला आहे. या धडक कारवाईमुळे परिसरातील दारू व्यवसाय करणाऱ्यांमध्ये प्रचंड खळबळ उडाली आहे. अशा प्रकारच्या बेकायदेशीर कृत्यांवर यापुढेही सातत्याने कडक कारवाई केली जाईल, असा सज्जड इशारा पोलीस प्रशासनाने दिला आहे.
