गोंडपिपरी : प्रतिनिधी
गोंडपिपरी शहरातील काही विशिष्ट वाईन बार आणि देशी दारू दुकानांमधून अवैध दारू वाहतूक मोठ्या प्रमाणावर सुरू असल्याचे चित्र समोर येत आहे. तालुक्यातील विविध ग्रामीण भागात राजरोसपणे दारूचा पुरवठा केला जात असून, यामुळे कायदा व सुव्यवस्थेचा प्रश्न निर्माण झाला आहे.
शहरातील परवानाधारक देशी-विदेशी दारू दुकानांतून दुचाकी वाहनांच्या माध्यमातून दिवसाढवळ्या दारूची वाहतूक केली जात असल्याचा आरोप नागरिकांकडून करण्यात येत आहे. विशेष म्हणजे हे प्रकार उघडपणे सुरू असतानाही पोलीस प्रशासन आणि उत्पादन शुल्क विभागाकडून प्रभावी कारवाई होत नसल्याने संशय व्यक्त केला जात आहे.
अवैध दारू विक्रेत्यांवर अधूनमधून कारवाई केली जात असली तरी दारू पुरवठा करणाऱ्या मुख्य साखळीवर कारवाई होत नसल्याने या व्यवसायाला अप्रत्यक्ष संरक्षण मिळत असल्याची चर्चा शहरात सुरू आहे. त्यामुळे पोलिसांच्या भूमिकेवर प्रश्नचिन्ह उपस्थित केले जात आहे.
ग्रामीण भागात सहजपणे दारू उपलब्ध होत असल्याने युवकांमध्ये व्यसनाधीनतेचे प्रमाण वाढण्याची भीती व्यक्त केली जात आहे. अवैध दारू वाहतुकीमुळे सामाजिक वातावरणही बिघडत असल्याचे नागरिकांचे म्हणणे आहे.
बीट जमादारांच्या कार्यपद्धतीवरही प्रश्न
गुन्हेगारीवर नियंत्रण ठेवणे, अवैध धंद्यांची माहिती गोळा करणे आणि वरिष्ठ अधिकाऱ्यांना माहिती देऊन कारवाई करणे ही बीट जमादारांची जबाबदारी असते. मात्र, या कामात दुर्लक्ष होत असल्याचा आरोप स्थानिकांकडून करण्यात येत आहे.
बीट क्षेत्रातील अवैध दारू विक्री आणि वाहतुकीकडे जाणीवपूर्वक दुर्लक्ष केले जात असल्याने गावोगावी दारू विक्रीला चालना मिळत असल्याची चर्चा सुरू आहे. त्यामुळे संबंधित विभागाने तातडीने लक्ष घालून अवैध दारू वाहतूक थांबवावी, अशी मागणी नागरिकांकडून होत आहे.
