गोंडपिपरी :
गोंडपिपरी तालुक्यातील वढोली येथे सुरू करण्यात आलेले दारूचे दुकान कायमस्वरूपी हटविण्याच्या मागणीसाठी ग्रामपंचायतीच्या वतीने दि. २५ रोजी विशेष ग्रामसभेचे आयोजन करण्यात आले होते. या ग्रामसभेत दारू दुकान कायमस्वरूपी बंद करण्यासंदर्भात एकमुखाने ठराव मंजूर करण्यात आला.
सुमारे ३० वर्षांपासून दारूबंदी असलेल्या वढोली गावात दारूचे दुकान सुरू झाल्याने ग्रामस्थांमध्ये तीव्र नाराजी व्यक्त करण्यात आली होती. प्रशासनाने दिलेला तात्पुरता बंदचा आदेश हा अंतिम उपाय नसल्याचे सांगत ग्रामस्थांनी दारू दुकान कायमस्वरूपी हटविण्याची मागणी लावून धरली आहे.
या मागणीसाठी ग्रामस्थांनी यापूर्वी उत्पादन शुल्क विभाग व जिल्हाधिकाऱ्यांना निवेदन दिले होते. त्यानंतर गुरुवारी विशेष ग्रामसभा घेण्यात आली. ग्रामसभेला संवर्ग विकास अधिकारी संजय पुप्पलवार, ठाणेदार रमेश हत्तीगोटे, उत्पादन शुल्क विभागाचे निरीक्षक अभिनंदन कांबळे, दुय्यम निरीक्षक सी.टी. दरोडे, अतुल भिवगडे, सहाय्यक दुय्यम निरीक्षक जगदीश कापटे, नायब तहसीलदार शेखर वेटे, विस्तार अधिकारी जीवन प्रधान, मंडळ अधिकारी सुकेसनी कांबळे, तलाठी अश्विनी शेळके, पोलिस उपनिरीक्षक मंगेश कराडे तसेच ग्रामसेवक जितेंद्र खोब्रागडे उपस्थित होते.
ही विशेष ग्रामसभा सकाळी ११ वाजता सुरू होऊन रात्री ९ वाजेपर्यंत चालली. दिवसभर कडक ऊन आणि सायंकाळी पावसाची हजेरी लागूनही ग्रामस्थांचा उत्साह कायम होता. गावातील सर्व प्रतिष्ठाने बंद ठेवण्यात आली होती. शेतीचा हंगाम सुरू असतानाही शेतकरी, मजूर आणि सर्व स्तरातील नागरिकांनी आपली दैनंदिन कामे बाजूला ठेवून ग्रामसभेत उत्स्फूर्त सहभाग नोंदविला.
ग्रामसभेत एकूण १६१४ मतदारांपैकी सुमारे १०४४ मतदारांनी उपस्थित राहून दारू दुकान हटविण्याच्या बाजूने लेखी स्वाक्षरीद्वारे आपले मत नोंदविले.
चक्का जाम आंदोलनानंतर गुन्हे दाखल
दारू दुकान सुरू झाल्यानंतर ते बंद करण्याच्या मागणीसाठी गोंडपिपरी-मूल मार्गावर १२ तास चक्का जाम आंदोलन करण्यात आले होते. या आंदोलनानंतर सरपंच राजेश कवठे, शिवसेना तालुका प्रमुख सूरज माडूरवार, रविंद्र कोहपरे, मनिषा कोहपरे, मोहन चुदरी, अखिल कोहपरे, श्रीकांत कानकाटे, नितीन शेकृतवार, भारत धंदरे, घनश्याम कोहपरे, रुपेश मेदाडे, सुरेश उपासे, संदीप लाटकर, राहुल देवाडे, शैलेश चौधरी, भगीरथ लांबाडे, गोपी आत्राम, गौरव झरकर, किशोर खरबनकर, रंजीत आभारे, मेघश्याम आभारे, राणी कोहपरे, रोहिणी कवठे, अल्का गेडाम, माया पोरटे आणि छबू आरेकर या २६ आंदोलनकर्त्यांवर बीएनएस आणि क्रिमिनल अमेंडमेंट ॲक्ट अंतर्गत गुन्हे दाखल करण्यात आले आहेत.
