अमरावती | प्रतिनिधी :
अमरावती विभागीय आयुक्त कार्यालयात विभागीय आयुक्त श्रीमती नयना अर्जुन गुंडे (भा.प्र.से.) यांची सदिच्छा भेट घेऊन राजनखेड ग्रामपंचायतीतील कथित आर्थिक गैरव्यवहाराबाबत लेखी निवेदन सादर करण्यात आले.
निवेदनात ग्रामपंचायत राजनखेड अंतर्गत सामान्य निधी (General Fund) तसेच १५ वा वित्त आयोग निधी यांच्या कामांमध्ये प्रशासनाची दिशाभूल करून लाखो रुपयांचा कथित भ्रष्टाचार झाल्याचा आरोप करण्यात आला आहे. सार्वजनिक निधीचा गैरवापर झाल्याचा दावा करत या प्रकरणाची सखोल चौकशी करण्याची मागणी करण्यात आली.
तसेच कथित भ्रष्टाचारात सहभागी असलेल्यांवर तसेच संबंधितांना पाठीशी घालणाऱ्या वरिष्ठ अधिकाऱ्यांवर तातडीने कायदेशीर कारवाई करण्यात यावी, अशी मागणीही विभागीय आयुक्तांकडे सादर करण्यात आलेल्या निवेदनातून करण्यात आली.
या प्रकरणाची निष्पक्ष चौकशी करून दोषींवर कठोर कारवाई करण्यात यावी, अशी अपेक्षा निवेदनकर्त्यांनी व्यक्त केली आहे.
