भोकरदन | प्रतिनिधी
भोकरदन शहरातील जोमाळा-फत्तेपूर परिसरात शुक्रवारी मोठी खळबळ उडाली. महाराष्ट्र दहशतवाद विरोधी पथकाने (एटीएस) २९ वर्षीय एका तरुणाला चौकशीसाठी ताब्यात घेतल्याची माहिती विश्वसनीय सूत्रांकडून समोर आली आहे. संबंधित तरुणाचे कथित पाकिस्तानी गँगस्टरच्या सोशल मीडिया नेटवर्कशी संशयास्पद संबंध असल्याच्या प्राथमिक माहितीनंतर ही कारवाई करण्यात आल्याचे सांगितले जात आहे.
प्राथमिक माहितीनुसार, संबंधित तरुण एका कथित पाकिस्तानी गँगस्टरचे फेसबुक अकाउंट फॉलो करत होता. तसेच व्हॉट्सअॅपद्वारेही संवाद झाल्याचा संशय तपास यंत्रणेला आहे. या पार्श्वभूमीवर एटीएसकडून त्याचा मोबाईल, सोशल मीडिया खाती, चॅटिंग, कॉल डिटेल्स तसेच इतर डिजिटल पुराव्यांची सखोल तपासणी सुरू असल्याची माहिती सूत्रांनी दिली आहे.
सूत्रांच्या माहितीनुसार, संबंधित तरुण व्यवसायाने ट्रॅक्टर चालक असून ग्रामीण भागातील एका युवकाचे नाव अशा संवेदनशील तपासात समोर आल्याने भोकरदन शहरासह परिसरात चर्चांना उधाण आले आहे.
दरम्यान, महाराष्ट्र एटीएसने मराठवाड्यातील बीडसह विविध जिल्ह्यांमध्ये समन्वित कारवाई केल्याची माहिती समोर येत आहे. पाकिस्तानस्थित कथित गँगस्टरच्या सोशल मीडिया व डिजिटल नेटवर्कशी काही व्यक्तींचा संशयास्पद संपर्क असल्याच्या प्राथमिक माहितीनंतर ही मोहीम राबविण्यात आल्याचा अंदाज व्यक्त केला जात आहे.
अधिकृत दुजोरा अद्याप नाही
या प्रकरणाबाबत महाराष्ट्र एटीएस किंवा स्थानिक पोलिसांकडून अद्याप कोणतेही अधिकृत निवेदन जारी करण्यात आलेले नाही. संबंधित तरुणाविरुद्ध कोणताही गुन्हा दाखल झाल्याची किंवा त्याला अटक झाल्याची अधिकृत माहितीही उपलब्ध नाही. सध्या तो चौकशीसाठी ताब्यात असून तपास पूर्ण झाल्यानंतरच या प्रकरणाचे वास्तविक स्वरूप स्पष्ट होणार आहे. त्यामुळे उपलब्ध माहिती ही प्रामुख्याने सूत्रांवर आधारित असून अधिकृत तपासानंतरच अंतिम वस्तुस्थिती समोर येणार आहे.
