श्रीगोंदा | प्रतिनिधी
श्रीगोंदा शहरात भरदिवसा एका व्यक्तीवर तलवारीने जीवघेणा हल्ला झाल्याची धक्कादायक घटना घडली असून, या हल्ल्यात गंभीर जखमी झालेल्या व्यक्तीला पुढील उपचारासाठी पुणे येथे हलविण्यात आले आहे. जखमी व्यक्तीचे आडनाव दांगडे असल्याची प्राथमिक माहिती समोर आली असून, हल्लेखोर व जखमी यांची संपूर्ण नावे अद्याप अधिकृतरीत्या समोर आलेली नाहीत.
ही घटना आज दुपारी ४ ते ४.३० वाजण्याच्या सुमारास श्रीगोंदा–मांडवगण रस्त्यावरील गणपती मळा परिसरात घडल्याची माहिती मिळाली आहे. प्राथमिक माहितीनुसार, चार जणांनी मिळून तलवारीने हल्ला करून संबंधित व्यक्तीला जीवे मारण्याचा प्रयत्न केला.
मिळालेल्या माहितीनुसार, जखमी व्यक्ती मुलीला क्लासला सोडण्यासाठी श्रीगोंद्यात आली होती. मुलीला सोडल्यानंतर ती आपल्या घुगलवडगाव गावाकडे परत जात असताना गणपती मळा परिसरात चार जणांनी तिचा रस्ता अडवून तलवारीने हल्ला केला.
हल्ल्यानंतर जीव वाचवण्यासाठी संबंधित व्यक्ती रस्त्यालगतच्या एका घरात धावत शिरली. त्या घरात फक्त महिला उपस्थित होत्या. मात्र, हल्लेखोरांनी घरात घुसूनही तलवारीने हल्ला सुरूच ठेवला. या हल्ल्यात जखमीच्या डोक्याला, कपाळाला आणि हाताला गंभीर दुखापत झाली. रक्ताच्या थारोळ्यात पडलेल्या व्यक्तीचा मृत्यू झाल्याचा समज झाल्याने हल्लेखोर घटनास्थळावरून पसार झाल्याची माहिती प्रत्यक्षदर्शींनी दिली.
स्थानिक नागरिकांनी तत्काळ जखमीला श्रीगोंदा येथील रुग्णालयात दाखल केले. मात्र, प्रकृती गंभीर असल्याने डॉक्टरांनी पुढील उपचारासाठी त्याला पुणे येथे हलविले.
प्राथमिक माहितीनुसार, जखमी व्यक्ती आणि हल्लेखोर हे सर्व घुगलवडगाव येथील असून, त्यांच्यातील कौटुंबिक अथवा भावकीतील जुन्या वादातून हा हल्ला झाल्याची चर्चा आहे. मात्र, याबाबत पोलिसांकडून अद्याप अधिकृत दुजोरा देण्यात आलेला नाही.
भरदिवसा घरात घुसून झालेल्या या जीवघेण्या हल्ल्यामुळे श्रीगोंदा परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. पोलिसांनी घटनास्थळी धाव घेऊन तपास सुरू केला असून, हल्लेखोरांचा शोध सुरू आहे.
