नांदखेड फाट्याजवळील घटना; चाकू व लोखंडी वस्तूने मारहाण करून १४ ते १५ हजार रुपये लुटल्याची तक्रार
पातूर : प्रतिनिधी— पातूर-अकोला मार्गावरील नांदखेड फाट्याजवळ अकोला येथील एका युवकाला चार ते पाच जणांनी अडवून चाकू व लोखंडी वस्तूने मारहाण करून त्याच्याकडील सुमारे १४ ते १५ हजार रुपये लुटल्याची घटना गुरुवारी सायंकाळी सात ते आठ वाजण्याच्या सुमारास घडल्याचे समोर आले आहे. यावेळी हल्लेखोरांनी बंदुकीचा धाक दाखवून पाच लाख रुपयांची खंडणी मागितल्याचा आरोप संबंधित युवकाने पातूर पोलिसांकडे केला आहे.
आयुब अली इरफान अली (रा. शिवणी, अकोला) हा मोटारसायकल क्रमांक एमएच ३० डीएच ५६५७ वरून पातूरकडून अकोल्याकडे जात होता. नांदखेड फाट्याजवळ चारचाकी वाहनातून आलेल्या चार ते पाच युवकांनी त्याला अडविले. त्यानंतर त्याला रस्त्याच्या कडेला नेऊन चाकू व लोखंडी वस्तूने मारहाण करण्यात आल्याचे त्याने पोलिसांना सांगितले. मारहाणीनंतर त्याच्या खिशातील १४ ते १५ हजार रुपये काढून घेतल्याचा आरोपही करण्यात आला आहे.
या घटनेत युवक जखमी झाला असून, त्याने तातडीने पातूर पोलीस ठाणे गाठून घटनेची माहिती दिली. संबंधित युवक इलेक्ट्रिशियनचे काम करत असून, कामानिमित्त पातूर येथे आला होता. येथून अकोल्याकडे परतत असताना नांदखेड फाट्याजवळ हा प्रकार घडल्याचे त्याने पोलिसांना सांगितले.
पातूरपासून काही किलोमीटर अंतरावर भररस्त्यावर घडलेल्या या घटनेमुळे परिसरात खळबळ उडाली आहे. रात्री उशिरापर्यंत पातूर पोलिसांकडून गुन्हा दाखल करण्याची प्रक्रिया सुरू होती. घटनेतील संशयितांचा शोध घेण्याचे आव्हान पोलिसांसमोर आहे.
दरम्यान, पातूर पोलीस ठाण्याच्या हद्दीत चोरी व लुटमारीच्या घटना घडत असल्याच्या पार्श्वभूमीवर या घटनेमुळे नागरिकांच्या सुरक्षेचा प्रश्न पुन्हा चर्चेत आला आहे. या प्रकरणाची सखोल चौकशी करून संशयितांचा तत्काळ शोध घ्यावा, अशी मागणी नागरिकांकडून होत आहे.
