अल्पदरात सर्वसमावेशक आरोग्य तपासणी; महिलांच्या आरोग्य जनजागृतीसाठी पुढाकार
पिंपरी | प्रतिनिधी
पिंपरी चिंचवड ऑटोमोटिव्ह सर्विस सोसायटीच्या शाहूनगर ग्रुपच्या वतीने सभासदांच्या कुटुंबातील महिलांसाठी शनिवार, दि. ११ जुलै २०२६ रोजी विशेष आरोग्य सहलीचे आयोजन करण्यात आले आहे. महिलांच्या आरोग्याविषयी जनजागृती व्हावी तसेच त्यांना तज्ज्ञ वैद्यकीय मार्गदर्शन मिळावे, या उद्देशाने हा उपक्रम राबविण्यात येत आहे.
या आरोग्य सहलीमध्ये कॉम्प्युटराईज्ड स्ट्रेस टेस्ट, ईसीजी (ECG), रक्तदाब, रँडम ब्लड शुगर, वजन, उंची, BMI आणि SpO₂ तपासणी करण्यात येणार आहे. तसेच पंचकर्मातील स्नेहन व स्वेदन उपचार, सात्विक आहार, योग, व्यायाम आणि संतुलित आहाराबाबत मार्गदर्शन करण्यात येईल. याशिवाय तज्ज्ञ डॉक्टरांकडून महिलांना वैयक्तिक आरोग्य सल्लाही दिला जाणार आहे.
या आरोग्य तपासणीचे मूळ शुल्क सुमारे ₹५,५०० असले तरी सोसायटीच्या विशेष पुढाकारामुळे महिलांना केवळ ₹७०० मध्ये या सुविधेचा लाभ मिळणार आहे. त्यामुळे सर्वसामान्य कुटुंबातील महिलांना अल्पदरात दर्जेदार आरोग्य सेवा उपलब्ध होणार आहे.
पिंपरी चिंचवड ऑटोमोटिव्ह सर्विस सोसायटी ही संस्था केवळ वाहन दुरुस्ती व्यवसायिकांच्या हितासाठी कार्य करत नसून सामाजिक बांधिलकी जपत आरोग्य, शिक्षण, समाजसेवा आणि जनकल्याणाशी संबंधित विविध उपक्रम सातत्याने राबवत आहे. मेकॅनिक व त्यांच्या कुटुंबीयांच्या सर्वांगीण विकासासाठी संस्था कटिबद्ध असल्याचे पदाधिकाऱ्यांनी सांगितले.
यावेळी संस्थेचे अध्यक्ष जयवंत सावंत, उपाध्यक्ष मंगेश साहिल, कार्याध्यक्ष विश्वास दौंडकर तसेच सहकार्याध्यक्ष निलेश भोसले यांनी सांगितले की, “मेकॅनिकल क्षेत्रातील कामगार आणि त्यांच्या कुटुंबीयांचे आरोग्य, शिक्षण व सामाजिक उन्नतीसाठी संस्था सातत्याने कार्यरत राहील. समाजोपयोगी उपक्रमांच्या माध्यमातून सभासद आणि समाजात सकारात्मक परिवर्तन घडवून आणण्याचा आमचा प्रयत्न आहे.”
