भोर | प्रतिनिधी
संत ज्ञानेश्वर महाराजांची पालखी पुण्यातून सासवडकडे मार्गस्थ असताना दिवेघाट परिसरात सूर्याभोवती इंद्रधनुष्याचे वलय (रिंगण) दिसल्याने वारकऱ्यांना एक अनोखा निसर्गाविष्कार अनुभवायला मिळाला. हे दुर्मिळ दृश्य पाहण्यासाठी अनेक वारकरी थांबले आणि या क्षणाचा आनंद लुटला.
पालखी मार्गावरील माऊलींच्या प्रतिमेच्या वर सूर्याभोवती तयार झालेल्या रंगीत वलयाने उपस्थित वारकऱ्यांचे विशेष लक्ष वेधले. अनेकांनी आपल्या आयुष्यात प्रथमच असे दृश्य पाहिल्याचे सांगितले.
गेल्या आठवडाभर झालेल्या मुसळधार पावसामुळे वारीवर काही प्रमाणात अडचणी निर्माण झाल्या होत्या. मात्र, पावसाचा जोर कमी झाल्याने आणि पूरस्थिती ओसरल्याने वारकऱ्यांमध्ये पुन्हा उत्साहाचे वातावरण निर्माण झाले आहे.
दरम्यान, तज्ज्ञांच्या मते सूर्याभोवती दिसणारे असे इंद्रधनुष्याचे वलय हे वातावरणातील बर्फाच्या सूक्ष्म स्फटिकांमुळे निर्माण होणारे नैसर्गिक प्रकाशीय दृश्य (Solar Halo) असून, ते विशिष्ट हवामान परिस्थितीत दिसून येते.
