परभणी | प्रतिनिधी :
भारत निवडणूक आयोगाच्या विशेष सखोल पुनरीक्षण (SIR) कार्यक्रमांतर्गत सुरू असलेल्या ईएफ (Enumeration Form) भरणे व डिजिटायझेशन मोहिमेत परभणी जिल्ह्यातील मानवत तालुक्याने उल्लेखनीय कामगिरी केली आहे. मानवत तालुक्यातील वांगी (भाग क्रमांक २१७) येथील मतदान केंद्रस्तरीय अधिकारी (BLO) भागवत वाघ यांनी आपल्या कार्यक्षेत्रातील १०० टक्के ईएफ फॉर्मचे डिजिटायझेशन यशस्वीरित्या पूर्ण केले. त्यांच्या या उत्कृष्ट कामगिरीबद्दल मंगळवारी (दि. १४ जुलै २०२६) त्यांचा सत्कार करण्यात आला.
या कामगिरीमुळे भागवत वाघ यांनी १४-पाथरी विधानसभा मतदारसंघात द्वितीय क्रमांक, तर मानवत तालुक्यात प्रथम क्रमांक पटकावत वांगी केंद्रासह मानवत तालुक्याचा मान उंचावला.
नायब तहसीलदार (महसूल-१) तथा सहाय्यक मतदार नोंदणी अधिकारी (AERO) संजय खिल्लारे यांच्या हस्ते भागवत वाघ यांना शाल, श्रीफळ व पुष्पगुच्छ देऊन सन्मानित करण्यात आले. यावेळी संजय खिल्लारे यांनी विशेष सखोल पुनरीक्षण मोहिमेत अचूक, पारदर्शक आणि वेळेत काम पूर्ण करणाऱ्या मतदान केंद्रस्तरीय अधिकाऱ्यांचे कौतुक केले.
सत्कार समारंभाला निवडणूक संगणक चालक राहुल खाडे, नागरी पर्यवेक्षक अजय उडते, महसूल सेवक बापू रासवे, संतोष वायकोस यांच्यासह संबंधित विभागातील अधिकारी व कर्मचारी उपस्थित होते. उपस्थित मान्यवरांनी भागवत वाघ यांच्या कार्याचे कौतुक करत इतर बीएलओंनीही त्यांच्या कामातून प्रेरणा घ्यावी, असे आवाहन केले.
यावेळी भागवत वाघ यांनी, “कर्तव्याप्रती असलेली निष्ठा, वेळेचे नियोजन आणि समर्पणभाव यामुळेच ही कामगिरी शक्य झाली,” असे मनोगत व्यक्त केले.
भागवत वाघ यांच्या या यशाबद्दल सहकारी अधिकारी, कर्मचारी तसेच वांगी गावातील नागरिकांकडून त्यांच्यावर अभिनंदनाचा वर्षाव होत असून, मानवत तालुक्यातील इतर बीएलओंसाठीही ही कामगिरी प्रेरणादायी ठरत आहे.
