सोनपेठ | प्रतिनिधी :
सोनपेठ शहरातील अल्पसंख्याक समाजातील विद्यार्थ्यांना मातृभाषेत दर्जेदार शिक्षणाची संधी उपलब्ध करून देण्यासाठी सोनपेठ नगर परिषदेने महत्त्वपूर्ण निर्णय घेतला आहे. नगराध्यक्ष परमेश्वर भैय्या कदम यांच्या विशेष पुढाकारातून नगर परिषद हद्दीत जिल्हा परिषद अंतर्गत नवीन उर्दू शाळा सुरू करण्याचा ठराव सर्वानुमते मंजूर करण्यात आला असून, त्यासंदर्भातील प्रस्ताव पुढील कार्यवाहीसाठी जिल्हा परिषद, परभणीकडे पाठविण्यात आला आहे.
दि. ३ जुलै २०२६ रोजी झालेल्या नगर परिषदेच्या सर्वसाधारण सभेत हा विषय ऐनवेळी मांडण्यात आला. सभेचे पिठासीन अधिकारी म्हणून नगराध्यक्ष परमेश्वर कदम यांनी अल्पसंख्याक समाजातील विद्यार्थ्यांना शिक्षणाचा मूलभूत हक्क मिळावा आणि गुणवत्तापूर्ण शिक्षणासाठी स्वतंत्र उर्दू शाळेची आवश्यकता असल्याचे सभागृहाच्या निदर्शनास आणून दिले.
या विषयावरील चर्चेदरम्यान गटनेते हाजी शेख इमामोद्दीन उर्फ सद्दाम मुस्ताक हुसेन, गटनेत्या सौ. सारिका श्रीकांत भोसले यांच्यासह सर्व नगरसेवकांनी प्रस्तावाला एकमुखी पाठिंबा दर्शविला. त्यानंतर हा ठराव सर्वानुमते मंजूर करण्यात आला.
नगर परिषदेच्या या निर्णयामुळे सोनपेठ शहर व तालुक्यातील अल्पसंख्याक समाजामध्ये समाधानाचे वातावरण निर्माण झाले आहे. विद्यार्थ्यांना त्यांच्या मातृभाषेत शिक्षणाची सुविधा उपलब्ध होण्यासाठी हा निर्णय महत्त्वपूर्ण ठरणार असल्याची भावना पालक आणि शिक्षणप्रेमी नागरिकांनी व्यक्त केली.
अल्पसंख्याक समाजाच्या शैक्षणिक उन्नतीसाठी सकारात्मक भूमिका घेतल्याबद्दल नगराध्यक्ष परमेश्वर भैय्या कदम तसेच सर्व नगरसेवकांचे विविध स्तरांतून अभिनंदन करण्यात येत आहे. हा ठराव प्रत्यक्षात येऊन लवकरात लवकर उर्दू शाळा सुरू व्हावी, अशी अपेक्षा नागरिकांनी व्यक्त केली.
