श्रीगोंदा | प्रतिनिधी
श्रीगोंदा नगरपरिषद कार्यक्षेत्रातील नागरिकांना मोठा दिलासा देणारा आणि शहराच्या विकासाला चालना देणारा महत्त्वपूर्ण निर्णय नगरपरिषदेच्या सर्वसाधारण सभेत एकमताने घेण्यात आला. महाराष्ट्र गुंठेवारी विकास अधिनियम, २०२१ मधील सुधारणांनुसार ३१ डिसेंबर २०२० पर्यंत यलो झोनमध्ये झालेल्या गुंठेवारी पद्धतीतील अनधिकृत बांधकामांचे नियमितीकरण करण्यात येणार असून, शासकीय जागेवरील निवासी अतिक्रमणेही नियमानुसार नियमित करण्यास सभेने मंजुरी दिली.
नगरपरिषदेच्या या निर्णयामुळे शहरातील हजारो सर्वसामान्य व मध्यमवर्गीय कुटुंबांना त्यांच्या घरांचे अधिकृत मालकी हक्क मिळविण्याचा मार्ग मोकळा होणार आहे. तसेच नागरिकांना मूलभूत सुविधा उपलब्ध होण्यास मदत होणार असून नगरपरिषदेच्या महसुलातही वाढ होण्याची अपेक्षा व्यक्त केली जात आहे.
या योजनेचा थेट संबंध नागरिकांच्या मालमत्तेशी असल्याने पात्र नागरिकांनी आवश्यक कागदपत्रांसह नगरपरिषद कार्यालयाशी संपर्क साधून या योजनेचा लाभ घ्यावा, असे आवाहन नगराध्यक्षा सुनीता खेतमाळीस, उपनगराध्यक्षा अलका अनभुले, मुख्याधिकारी पुष्पगंधा भगत तसेच नगरसेवकांनी केले आहे.
नगरपरिषदेच्या या निर्णयामुळे श्रीगोंदा शहरातील दीर्घकाळ प्रलंबित असलेल्या गुंठेवारी व अतिक्रमण नियमितीकरणाच्या प्रश्नाला मार्ग मिळणार असल्याने नागरिकांमध्ये समाधानाचे वातावरण निर्माण झाले आहे.
