योगेश जामदार यांच्या वाढदिवसानिमित्त सामाजिक उपक्रम; वाचन संस्कृती व बालसंस्कारांना चालना
शिरूर | प्रतिनिधी
वाढदिवसाचा अनावश्यक खर्च टाळून तो समाजोपयोगी कार्यासाठी वापरण्याचा आदर्शवत उपक्रम शिरूर तालुका कुंभार समाजाचे अध्यक्ष योगेश सुदामराव जामदार यांच्या वाढदिवसानिमित्त राबविण्यात आला. प्रभाग क्रमांक २ मधील नगरसेविका स्वप्नाली जामदार मित्र परिवाराच्या वतीने चालविण्यात येणाऱ्या बालसंस्कार वर्गातील मुलांना संस्कारक्षम गोष्टींच्या पुस्तकांचे वाटप करण्यात आले.
हा उपक्रम देशाचे दानशूर उद्योगपती प्रकाशभाऊ धारिवाल यांच्या प्रेरणेने तसेच शिरूरच्या नगराध्यक्षा ऐश्वर्याताई पाचर्णे यांच्या मार्गदर्शनाखाली आयोजित करण्यात आला. वाढदिवसानिमित्त समाजोपयोगी कार्य करण्याची परंपरा जपत योगेश जामदार यांच्या मित्र परिवाराकडून दरवर्षी विविध सामाजिक उपक्रम राबविले जातात.
यापूर्वी वृक्षारोपण, पेपर वाचनालय सुरू करणे, विद्यार्थ्यांना शालेय साहित्याचे वाटप तसेच दशक्रिया घाटाकडे जाणाऱ्या रस्त्यांवर दिशादर्शक फलक उभारणे असे विविध उपक्रम राबविण्यात आले आहेत. यंदा ५ ते २० वर्षे वयोगटातील बालसंस्कार वर्गातील मुलांना गोष्टींची पुस्तके भेट देऊन त्यांच्यामध्ये वाचनाची आवड निर्माण करण्याचा प्रयत्न करण्यात आला.
यावेळी योगेश जामदार म्हणाले, “मुलांची मोबाईलकडे वाढलेली ओढ कमी होऊन त्यांनी सोशल मीडियापासून दूर राहून वाचनाची सवय लावावी, हा या उपक्रमामागील प्रमुख उद्देश आहे. गोष्टींच्या माध्यमातून मुलांना संस्कार, नैतिक मूल्ये आणि बोधकथा सहजपणे समजतील.”
याशिवाय भविष्यात मुलांसाठी व युवकांसाठी सुसज्ज वाचनालय, अभ्यासिका तसेच MPSC/UPSC मार्गदर्शन केंद्र सुरू करण्याचा मानस असल्याची माहितीही त्यांनी दिली.
कार्यक्रमाचे आयोजन कुंभार आळी मित्र मंडळ यांच्या वतीने करण्यात आले. यावेळी नगरसेविका स्वप्नाली जामदार, संजय कडेकर, अमित शिर्के (राष्ट्रवादी युवक अध्यक्ष), संतोष जामदार, संगीता पाटील (जीवन विद्या मिशन), मोनालिज्ञस्वामी, डॉ. वैशाली साखरे, शिरसाठ मॅडम, विजय शेजवळ, राजकुमार स्वामी, विष्णू जामदार, शंकर जामदार, दीपक शिर्के, शरद जामदार यांच्यासह पालक व नागरिक मोठ्या संख्येने उपस्थित होते.
वाढदिवसाचे औचित्य साधून मुलांमध्ये वाचन संस्कृती, चांगले संस्कार आणि सामाजिक जाणीव रुजविण्याचा हा उपक्रम उपस्थितांकडून विशेष कौतुकास पात्र ठरला.
