कुरुंदवाड | प्रतिनिधी
शिरोळ तालुक्यातील घोसरवाड येथे चालत्या इलेक्ट्रिक स्कूटरला शॉर्ट सर्किटमुळे अचानक आग लागून स्कूटर पूर्णपणे जळून खाक झाल्याची घटना रविवारी (दि. १२) घडली. या दुर्घटनेत सुदैवाने कोणतीही जीवितहानी झाली नाही; मात्र सुमारे ८० हजार रुपयांचे नुकसान झाले आहे. याप्रकरणी कुरुंदवाड पोलीस ठाण्यात जळीत नोंद करण्यात आली आहे.
मिळालेल्या माहितीनुसार, इचलकरंजी येथील कापड मार्केट परिसरातील रहिवासी व थ्रेडिंग व्यावसायिक हेमंतकुमार भँवरलाल लोया (वय ४०) हे रविवारी दुपारी सुमारे ३.१० वाजता आपल्या टीव्हीएस आयक्युब (MH-09-GB-8530) या इलेक्ट्रिक स्कूटरवरून घोसरवाड–सदलगा मार्गाने जात होते.
घोसरवाड गावच्या हद्दीतील शेती गट क्रमांक ६५४ जवळ पोहोचताच स्कूटरमध्ये अचानक शॉर्ट सर्किट झाले. काही क्षणांतच स्कूटरमधून धूर निघू लागला आणि भीषण आग लागली. आगीने संपूर्ण स्कूटर भस्मसात झाली.
घटनेनंतर हेमंतकुमार लोया यांनी कुरुंदवाड पोलीस ठाण्यात तक्रार दाखल केली. पोलिसांनी घटनेची नोंद करून पुढील तपास सुरू केला असून पोलीस हेड कॉन्स्टेबल साळुंखे अधिक तपास करत आहेत.
