कुरुंदवाड | प्रतिनिधी :
शिरोळ तालुक्यातील तेरवाड येथील ग्रामदैवत श्री मंगराया देवालयाचा वीजपुरवठा तब्बल चार महिन्यांपासून बंद असल्याने भाविकांमध्ये तीव्र नाराजी होती. स्मार्ट मीटर बसविल्याशिवाय वीजपुरवठा सुरू केला जाणार नाही, अशी भूमिका महावितरणने घेतल्याचा आरोप ग्रामस्थांनी केला होता.
याबाबत तेरवाड ग्रामस्थांनी एकत्र येत बैठक घेऊन सोमवार (१३ जुलै) रोजी कुरुंदवाड येथील महावितरणच्या उपकार्यकारी अभियंता कार्यालयावर धडक दिली. ग्रामस्थांनी निवेदन सादर करून देवालयाचा वीजपुरवठा तातडीने सुरू करावा, तसेच ग्राहकांच्या लेखी संमतीशिवाय स्मार्ट किंवा प्रीपेड मीटर बसवू नयेत आणि बसवलेले मीटर काढून पूर्वीचे मीटर बसवावेत, अशी मागणी केली.
उपकार्यकारी अभियंता सोनवणे यांनी निवेदनाची दखल घेत तात्काळ देवालयाचा वीजपुरवठा पूर्ववत करण्याचे आदेश दिल्यानंतर मंदिरातील वीज जोडणी पुन्हा सुरू करण्यात आली. त्यामुळे भाविक आणि ग्रामस्थांनी समाधान व्यक्त केले.
या आंदोलनात धनाजी चूडमुंगे, दीपक पाटील, नागेश काळे, राकेश जगदाळे, प्रभाकर बंडगर, देवालयाचे पुजारी आनंदा पुजारी, महेश बनसोडे, जालिंदर सांडगे, राजू पाटील, सुरेश चोपडे, विनायक पुजारी, कृष्णात शिवाप्पा भेंडे, विरपाक्ष राजमाने यांच्यासह मोठ्या संख्येने भाविक व ग्रामस्थ सहभागी झाले.
