कुरुंदवाड | प्रतिनिधी :
महाराष्ट्र राज्य वन विभागाच्या ‘हरित महाराष्ट्र, समृद्ध महाराष्ट्र’ अभियानांतर्गत कुरुंदवाड पोलीस ठाण्याच्या आवारात आणि परिसरात विविध जातींच्या सुमारे ५०० वृक्षांची लागवड करण्यात आली. या उपक्रमामुळे पोलीस ठाण्याचा परिसर अधिक हिरवागार व आकर्षक बनत असून पर्यावरण संवर्धनाला चालना मिळत आहे.
कुरुंदवाड पोलीस ठाण्याचे सहाय्यक पोलीस निरीक्षक संतोष माने यांच्या पुढाकारातून पोलीस ठाण्याच्या नव्या इमारतीमागील परिसराचे सपाटीकरण, तारेचे कुंपण, नियोजनबद्ध वृक्षलागवड तसेच सुशोभीकरणाची कामे हाती घेण्यात आली. प्रत्येक झाड योग्य अंतरावर लावून त्यासाठी खड्डे, शेणखत, कीडप्रतिबंधक औषधांचा वापर आणि आधारासाठी काठ्यांची व्यवस्था करण्यात आली.
यासोबतच जप्त वाहनांसाठी स्वतंत्र पार्किंग व्यवस्था, दुचाकी व चारचाकी वाहनांचे स्वतंत्र नियोजन, पोलीस परेड मैदानाचे सपाटीकरण, वाहन पार्किंगसाठी शेड तसेच नागरिकांसाठी बगीचा आणि ज्येष्ठ नागरिकांसाठी खुल्या व्यायामशाळेचे (जिम) कामही सुरू करण्यात आले आहे.
या नियोजनबद्ध उपक्रमामुळे कुरुंदवाड पोलीस ठाण्याचे रूप पालटत असून स्वच्छ, शिस्तबद्ध आणि पर्यावरणपूरक पोलीस ठाण्याचा आदर्श निर्माण होत असल्याची भावना नागरिकांकडून व्यक्त होत आहे. सहाय्यक पोलीस निरीक्षक संतोष माने आणि अधिकारी जीवन पाटील यांच्या मार्गदर्शनाखाली सुरू असलेल्या या उपक्रमाचे सर्व स्तरांतून कौतुक होत आहे.
