कुरुंदवाड | प्रतिनिधी :
कुरुंदवाड येथील साने गुरुजी विद्यालयात मंगळवारी (दि. १४ जुलै) राष्ट्रीय आपत्ती व्यवस्थापन आणि शिरोळ तालुका आपत्ती व्यवस्थापन वजीर रेस्क्यू फोर्स यांच्या संयुक्त विद्यमाने आपत्ती व्यवस्थापन विषयक जनजागृती व प्रात्यक्षिक कार्यक्रम आयोजित करण्यात आला.
कार्यक्रमात हवालदार बाईसा तांबे यांनी विद्यार्थ्यांना नैसर्गिक आणि मानवनिर्मित आपत्तीच्या प्रसंगी घ्यावयाची काळजी, सुरक्षितता उपाययोजना आणि आपत्कालीन परिस्थितीत कसे वागावे याबाबत मार्गदर्शन केले. टीम कमांडर महेश शिंदे यांनी नैसर्गिक व मानवनिर्मित अशा दोन्ही प्रकारच्या आपत्तींचा सामना करण्यासाठी पूर्वतयारी आणि जागरूकतेचे महत्त्व अधोरेखित केले.
यावेळी सब इन्स्पेक्टर अजय यादव यांच्यासह २७ सदस्यीय रेस्क्यू पथकाने विविध आपत्तीजन्य परिस्थितींमध्ये बचावकार्य कसे करावे याची प्रत्यक्ष प्रात्यक्षिके सादर केली. विद्यार्थ्यांनीही या प्रात्यक्षिकांना उत्स्फूर्त प्रतिसाद दिला.
कार्यक्रमाच्या प्रारंभी विद्यालयाचे मुख्याध्यापक किरण पाटील यांनी उपस्थित पथकाचे स्वागत केले, तर मस्के सर यांनी पाहुण्यांचा परिचय करून दिला. कार्यक्रमास विद्यालयातील शिक्षक, शिक्षकेतर कर्मचारी आणि सर्व विद्यार्थी उपस्थित होते.
या उपक्रमाचे आयोजन विजय माळी, गुदले सर आणि फळे सर यांनी केले. कार्यक्रमाच्या शेवटी मरळे सर यांनी उपस्थितांचे आभार मानले.
