पाथरी | प्रतिनिधी :
महाराष्ट्र राज्य मार्ग परिवहन महामंडळाच्या (एसटी) ७८ व्या वर्धापन दिनानिमित्त परिवहन मंत्र्यांनी दिलेल्या ‘७८ हजार वृक्ष लागवड’ अभियानाच्या आवाहनाला प्रतिसाद देत पाथरी बसस्थानक परिसरात वृक्षारोपणाचा कार्यक्रम उत्साहात पार पडला. पर्यावरण संवर्धनाचा संदेश देणाऱ्या या उपक्रमात विविध मान्यवरांच्या हस्ते वृक्षलागवड करण्यात आली.
यावेळी पाथरी नगर परिषदेचे उपनगराध्यक्ष आलोक चौधरी, पाथरी पोलीस ठाण्याचे पोलीस निरीक्षक लक्ष्मण केंद्रे आणि गटशिक्षणाधिकारी मुकेश राठोड यांच्या हस्ते वृक्षारोपण करण्यात आले. उपस्थित मान्यवरांनी वृक्ष लागवडीसोबतच त्यांचे संवर्धन करण्याचे महत्त्व अधोरेखित करत पर्यावरण संरक्षणासाठी प्रत्येकाने पुढाकार घेण्याचे आवाहन केले.
कार्यक्रमास बसस्थानक प्रमुख गजानन येडले, आगार लेखाकार शंकर चपाटे, वाहतूक नियंत्रक विश्वनाथ होळकर, प्रभाकर तालेवर, अशोक चिलवंत, विश्वभर भोकरे, उपहारगृह चालक नितीन राठोड, लिपिक विशाखा भदरगे, मयुरी म्हेत्रे, वर्षा उजगरे, बाळकृष्ण लेवडे, सोमेश्वर सुरवसे, काळे यांच्यासह आगारातील अधिकारी व कर्मचारी उपस्थित होते. तसेच पत्रकार सुनील तळेकर यांनीही कार्यक्रमाला उपस्थिती दर्शविली.
एसटी महामंडळाच्या वर्धापन दिनाचे औचित्य साधून आयोजित करण्यात आलेल्या या उपक्रमामुळे बसस्थानक परिसर अधिक हिरवागार होण्यास मदत होणार असून पर्यावरण संवर्धनाबाबत जनजागृतीलाही चालना मिळणार असल्याची भावना उपस्थितांनी व्यक्त केली. तसेच भविष्यातही अशा पर्यावरणपूरक उपक्रमांमध्ये सक्रिय सहभाग घेण्याचा निर्धार करण्यात आला.
