प्रतिनिधी | निलंगा
निलंगा शहरातील विकासकामांचा आढावा, पावसाळी नियोजन आणि नागरिकांना मूलभूत सुविधा सुरळीत उपलब्ध करून देण्याच्या उद्देशाने सोमवारी निलंगा नगर परिषदेत आढावा व नियोजन बैठक पार पडली. या बैठकीच्या अध्यक्षस्थानी माजी मंत्री तथा आमदार संभाजी पाटील निलंगेकर होते.
बैठकीत शहरातील सुरू असलेल्या विकासकामांचा सविस्तर आढावा घेण्यात आला. विशेषतः अपूर्ण रस्त्यांची कामे तातडीने पूर्ण करण्याचे निर्देश आमदार निलंगेकर यांनी संबंधित अधिकाऱ्यांना दिले. तसेच पावसाळ्यात नागरिकांना कोणत्याही प्रकारचा त्रास होऊ नये, यासाठी आवश्यक उपाययोजना तातडीने राबविण्याच्या सूचना देण्यात आल्या.
निलंगा शहरातील रस्ते, पाणीपुरवठा, स्वच्छता, जलनिस्सारण व्यवस्था आणि इतर पायाभूत सुविधांची कामे अधिक सक्षमपणे व वेळेत पूर्ण करण्यावर बैठकीत सविस्तर चर्चा झाली. विकासकामांच्या गुणवत्तेबाबत कोणतीही तडजोड न करता नियोजित वेळेत कामे पूर्ण करण्यावर भर देण्यात आला.
यावेळी तालुकाध्यक्ष संजयराज हलगरकर, माजी नगराध्यक्ष कुमुद लोभे, उपनगराध्यक्ष बाळासाहेब शिंगाडे, आशा पुलारी, गटनेते वीरभद्र स्वामी, सभापती पूजा मोहोळकर तसेच नगर परिषदेचे अधिकारी व पदाधिकारी उपस्थित होते.
बैठकीत शहरातील नागरिकांना मूलभूत सुविधा अधिक प्रभावीपणे उपलब्ध करून देण्यासाठी विविध विकासकामांचे नियोजन करण्यात आले असून, अपूर्ण कामे तातडीने पूर्ण करण्यावर विशेष भर देण्यात आला.
