प्रतिनिधी | सांगली
सांगली शहरातील कृष्णा नदीमध्ये आज (बुधवारी) सकाळी पोहत असताना ६० वर्षीय व्यक्तीवर मगरीने हल्ला केल्याची घटना घडली. या हल्ल्यात जालिंदर साळुंखे (उर्फ नाना) हे जखमी झाले असून त्यांच्यावर सध्या सांगलीच्या शासकीय (सिव्हिल) रुग्णालयात उपचार सुरू आहेत.
मिळालेल्या माहितीनुसार, जालिंदर साळुंखे हे दररोजप्रमाणे आपल्या सहकाऱ्यांसोबत सकाळी कृष्णा नदीत पोहण्यासाठी गेले होते. यावेळी अचानक मगरीने त्यांच्यावर हल्ला केला. त्यांच्या सोबत असलेल्या नागरिकांनी तत्काळ मदत करून त्यांना नदीबाहेर काढले आणि उपचारासाठी सांगली सिव्हिल रुग्णालयात दाखल केले.
घटनेमुळे परिसरात भीतीचे वातावरण निर्माण झाले असून नदीकाठावरील नागरिकांमध्ये चिंतेचे वातावरण आहे. या पार्श्वभूमीवर प्रशासनाने नदी परिसरात सतर्कता बाळगण्याचे आवाहन केले असून, नागरिकांनी कृष्णा नदीत पोहण्यासाठी किंवा अन्य कारणांसाठी उतरताना विशेष काळजी घ्यावी, असे आवाहन करण्यात येत आहे.
दरम्यान, संबंधित यंत्रणेकडून घटनेची नोंद घेण्यात आली असून पुढील आवश्यक उपाययोजना करण्यात येत आहेत.
