पुणे प्रतिनिधी
पुणे शहरातील हडपसर परिसरातील मांजरी येथे एका सराफी पेढीच्या शेजारील खोलीतून भिंतीला भगदाड पाडून चोरट्यांनी सराफी दुकानात प्रवेश करत मोठी चोरी केल्याची घटना उघडकीस आली आहे. या चोरीत 21 तोळे सोने आणि 94 किलो चांदीचे दागिने लंपास करण्यात आल्याची प्राथमिक माहिती आहे.
ही घटना मांजरी येथील म्हसोबा वस्ती परिसरातील आराध्या ज्वेलर्स येथे घडली. मिळालेल्या माहितीनुसार, चोरट्यांनी प्रथम दुकानालगतच्या खोलीत प्रवेश केला. त्यानंतर भिंतीला मोठे भगदाड पाडून सराफी पेढीत शिरकाव केला. दुकानातील लॉकर आणि दागिन्यांचे कपाट फोडून सोने-चांदीचे दागिने चोरी करून ते पसार झाले.
घटनेची माहिती मिळताच हडपसर पोलीस, गुन्हे शाखेचे पथक आणि श्वान पथकाने घटनास्थळी धाव घेत पंचनामा केला. तपासादरम्यान दुकानात गॅस कटर आढळून आला असून, त्याचाच वापर करून चोरी करण्यात आल्याचा प्राथमिक अंदाज पोलिसांनी व्यक्त केला आहे.
परिसरातील काही सीसीटीव्ही कॅमेऱ्यांमध्ये संशयित कैद झाले असले, तरी त्यांनी चेहरे झाकल्यामुळे त्यांची ओळख अद्याप पटलेली नाही. चोरीस गेलेल्या ऐवजाची अचूक किंमत निश्चित करण्याचे काम सुरू असून, पुढील तपास सुरू आहे.
दरम्यान, दुकानाचा राखणदार संशयास्पदरीत्या बेपत्ता असल्याची माहिती समोर आली असून, पोलीस त्याचाही शोध घेत आहेत. या प्रकरणी मांजरी पोलीस ठाण्यात गुन्हा दाखल करण्यात आला असून, चोरट्यांचा शोध घेण्यासाठी विशेष पथके कार्यरत आहेत.
