ता. पातूर | प्रतिनिधी
पातूर तालुक्यातील नवेगाव–उंबरवाडी तसेच परिसरातील गावांमध्ये सुरू असलेल्या कथित अवैध गावठी दारूविक्रीविरोधात महिला व ग्रामस्थांनी आक्रमक भूमिका घेतली आहे. सामाजिक कार्यकर्ते निलेश तोताराम कापकर यांच्या पुढाकाराने प्रशासनाकडे निवेदन देत अवैध दारूविक्री तातडीने बंद करून संबंधितांवर कठोर कारवाई करण्याची मागणी करण्यात आली आहे.
ग्रामस्थांच्या म्हणण्यानुसार, परिसरात अनेक दिवसांपासून अवैध दारूची विक्री सुरू असून त्यामुळे तरुणांमध्ये आणि अल्पवयीन मुलांमध्ये व्यसनाचे प्रमाण वाढत आहे. अनेक कुटुंबांवर त्याचे गंभीर परिणाम होत असून दारूच्या नशेत वाहन चालविण्यामुळे अपघातांची संख्याही वाढत असल्याची तक्रार करण्यात आली आहे.
नागरिकांनी यापूर्वीही संबंधित प्रशासनाकडे अनेक वेळा तक्रारी केल्याचा दावा करत, अपेक्षित कारवाई होत नसल्याबद्दल नाराजी व्यक्त केली आहे. त्यामुळे अवैध दारूविक्री तात्काळ बंद करून दोषींवर कठोर कायदेशीर कारवाई करण्यात यावी, अशी मागणी करण्यात आली आहे.
निवेदनात २९ जून २०२६ रोजी सावरगाव–झरंडी मार्गावर झालेल्या भीषण अपघाताचाही उल्लेख करण्यात आला आहे. या अपघातात आकाश शेषराव शिंदे आणि अजय चोंढकर या दोन युवकांचा मृत्यू झाला, तर तिसरा युवक गंभीर जखमी होऊन नागपूर येथील रुग्णालयात उपचार घेत असल्याचे नमूद करण्यात आले आहे. या घटनेमुळे परिसरात हळहळ व्यक्त होत असून अवैध दारूविक्रीवर प्रभावी नियंत्रण नसल्याबद्दल नागरिकांनी चिंता व्यक्त केली आहे.
दरम्यान, अकोला जिल्हाधिकारी, जिल्हा पोलीस अधीक्षक तसेच संबंधित पोलीस अधिकाऱ्यांना लेखी निवेदन देण्यात आल्याची माहिती देत, तातडीने कारवाई न झाल्यास भविष्यात उद्भवणाऱ्या परिस्थितीची जबाबदारी प्रशासनाची राहील, असा इशाराही देण्यात आला आहे.
याच पार्श्वभूमीवर ९ ऑगस्ट (क्रांती दिन) रोजी आलेगाव, कार्ला, गोळेगाव, पाडशिंगी, सावरगाव, झरंडी, नवेगाव, उंबरवाडी, अंधारसांगवी, पांढुर्णा, सोनुना, पिंपळडोळी आदी गावांतील महिला-पुरुषांच्या सहभागातून अकोला जिल्हाधिकारी कार्यालयावर जनआक्रोश मोर्चा काढण्यात येणार असल्याची घोषणा करण्यात आली आहे.
या वेळी दुर्गाबाई ठाकरे, लताबाई डुकरे, शीतल धंदरे, रूपाली वाथे, शोभा डाखोरे, शालिनी वाथे, कमलाबाई ताजने, लक्ष्मीबाई तिवाले, पारूबाई गायकवाड, कमलाबाई धंदरे, रुक्मा शिंदे, निलेश तोताराम कापकर, समाधान शिंदे आणि समाधान गाढवे यांच्यासह अनेक महिला व ग्रामस्थ उपस्थित होते.
