पोलादपूर | प्रतिनिधी
पोलादपूर नगरपंचायत हद्दीतील छत्रपती शिवाजीनगर, प्रभाग क्रमांक १४ येथे धोकादायक अवस्थेत असलेल्या झाडांमुळे नागरिकांच्या सुरक्षिततेचा प्रश्न निर्माण झाला आहे. या पार्श्वभूमीवर नगरसेविका सौ. अंकिता महेश निकम यांनी संबंधित झाडांवर तात्काळ कारवाई करण्याची मागणी केली आहे.
यासंदर्भात त्यांनी पोलादपूर नगरपंचायतीचे मुख्याधिकारी यांना निवेदन सादर करून संबंधित ठिकाणाची तातडीने पाहणी करण्याची विनंती केली आहे. परिसरातील चार झाडांच्या मोठ्या फांद्या रस्त्यावर तसेच घरांच्या दिशेने झुकल्या असून, पावसाळ्यात जोरदार वारे आणि पावसामुळे त्या तुटून अपघात होण्याची शक्यता असल्याचे निवेदनात नमूद करण्यात आले आहे.
नगरसेविका अंकिता निकम यांनी धोकादायक फांद्या तातडीने छाटण्यात याव्यात तसेच आवश्यकतेनुसार झाडांची उंची सुरक्षित मर्यादेत आणावी, जेणेकरून नागरिकांच्या जीवित व मालमत्तेचे नुकसान टाळता येईल, अशी मागणी केली आहे.
सध्या पावसाळ्याचा कालावधी सुरू असल्याने अशा धोकादायक झाडांकडे प्रशासनाने गांभीर्याने लक्ष देऊन त्वरित आवश्यक कार्यवाही करावी, अशी अपेक्षा स्थानिक नागरिकांसह नगरसेविका सौ. अंकिता निकम यांनी व्यक्त केली आहे.
