चामोर्शी | प्रतिनिधी
गडचिरोली-चिमूर लोकसभा मतदारसंघाचे खासदार डॉ. नामदेव किरसान यांच्या स्थानिक क्षेत्र विकास निधीतून चामोर्शी तालुक्यातील हळदवाही (टोला) येथे सुमारे १० लाख रुपये खर्चून उभारण्यात आलेल्या अत्याधुनिक व सुसज्ज अभ्यासिकेचे लोकार्पण उत्साहपूर्ण वातावरणात संपन्न झाले.
कार्यक्रमाचे उद्घाटन छत्रपती दुधे यांच्या हस्ते झाले. कार्यक्रमाच्या अध्यक्षस्थानी सोमजी गाळवे होते. यावेळी उपसरपंच छत्रपती दुर्गे, प्रविण खेडेकर, नानाजी रामटेके, लालाजी वाळके, रविंद्र मेश्राम, विलास दुधे, निलेश मेश्राम, धम्मशील दुधे, तथागत मेश्राम, बंडू गणवीर, नवीन मेश्राम तसेच बुरमवार यांच्यासह अनेक मान्यवर उपस्थित होते.
यावेळी उपस्थित मान्यवरांनी ग्रामीण भागातील विद्यार्थ्यांना दर्जेदार शैक्षणिक सुविधा उपलब्ध करून देण्यासाठी खासदार डॉ. नामदेव किरसान यांनी केलेल्या प्रयत्नांचे कौतुक केले. विद्यार्थ्यांना शांत, सुरक्षित आणि अभ्यासासाठी पोषक वातावरण उपलब्ध व्हावे, तसेच स्पर्धा परीक्षांची तयारी करणाऱ्या युवकांना आवश्यक सुविधा मिळाव्यात, या उद्देशाने ही अभ्यासिका उभारण्यात आल्याचे यावेळी सांगण्यात आले.
या अभ्यासिकेमुळे हळदवाही (टोला) व परिसरातील विद्यार्थ्यांना नियमित अभ्यासासाठी आधुनिक सुविधा उपलब्ध होणार असून, गावाच्या शैक्षणिक विकासाला नवी दिशा मिळेल, असा विश्वास उपस्थितांनी व्यक्त केला.
या लोकार्पण सोहळ्यास गावातील नागरिक, विद्यार्थी, पालक, युवक तसेच विविध क्षेत्रातील मान्यवर मोठ्या संख्येने उपस्थित होते. कार्यक्रम उत्साहपूर्ण वातावरणात संपन्न झाला.
