जत प्रतिनिधी :
राष्ट्रीय महामार्ग क्रमांक 965G (NH-965G) वरील शेगाव (ता. जत) परिसरात वारंवार होणारे अपघात रोखण्यासाठी शिवसेनेने आक्रमक भूमिका घेतली आहे. धोकादायक ठरलेल्या ‘ब्लॅक स्पॉट’वर तातडीने उपाययोजना कराव्यात, या मागणीसाठी शिवसेना जत तालुक्याच्या वतीने १६ जुलै रोजी ‘रस्ता रोको’ आंदोलनाचा इशारा देण्यात आला आहे.
या पार्श्वभूमीवर शिवसेना जत तालुकाप्रमुख अंकुश हुवाळे यांच्या नेतृत्वाखालील शिष्टमंडळाने जतचे उपविभागीय अधिकारी यांची भेट घेऊन महामार्गावरील वाढत्या अपघातांबाबत सविस्तर चर्चा केली. बैठकीनंतर प्रशासनाने तातडीने दखल घेत राष्ट्रीय महामार्ग प्राधिकरणाच्या (NHAI) अधिकाऱ्यांना शेगाव येथे भेट देण्याचे निर्देश दिले आहेत.
आज शेगावात NHAI अधिकाऱ्यांची बैठक
उपविभागीय अधिकाऱ्यांनी संबंधित प्रशासकीय अधिकारी आणि NHAI पंढरपूर विभागाच्या अधिकाऱ्यांशी दूरध्वनीवरून संपर्क साधून १५ जुलै रोजी शेगाव येथे ग्रामस्थांसोबत बैठक घेण्याचे निर्देश दिले. या बैठकीत अपघात रोखण्यासाठी करण्यात येणाऱ्या उपाययोजनांबाबत प्रशासनाची भूमिका लेखी स्वरूपात मांडण्यासही सांगण्यात आले आहे.
शिवसेनेच्या प्रमुख मागण्या
- शेगाव येथील धोकादायक ब्लॅक स्पॉटवर तातडीने स्पीड ब्रेकर बसविण्यात यावेत.
- वाहनचालकांच्या सुरक्षिततेसाठी आवश्यक त्या ठिकाणी दिशादर्शक आणि इशारा फलक उभारावेत.
- महामार्गावरील अपघात टाळण्यासाठी कायमस्वरूपी तांत्रिक उपाययोजना तातडीने राबवाव्यात.
बैठकीच्या निर्णयावर आंदोलनाची दिशा
शिवसेनेच्या आंदोलनाला शेगाव ग्रामस्थांसह विविध पक्षांच्या स्थानिक नेत्यांनी पाठिंबा दर्शविला आहे. त्यामुळे हे आंदोलन सर्वपक्षीय स्वरूप धारण करत आहे. आज होणाऱ्या बैठकीतील निर्णयानंतर १६ जुलै रोजी प्रस्तावित रस्ता रोको आंदोलनाबाबत अंतिम निर्णय घेण्यात येणार आहे.
शेगाव ग्रामपंचायत येथे होणाऱ्या या बैठकीस सर्व ग्रामस्थांनी मोठ्या संख्येने उपस्थित राहावे, असे आवाहन शिवसेनेच्या वतीने करण्यात आले आहे.
या बैठकीस शिवसेना तालुकाप्रमुख अंकुश हुवाळे, वैद्यकीय सहायता कक्ष तालुकाप्रमुख दीपक बुरुटे, उपतालुकाप्रमुख चंद्रकांत शिंदे, शिवसेना नेते दर्याप्पा जतकर, शिवकुमार शिंदे तसेच ओम साई प्रतिष्ठान, शेगावचे अध्यक्ष मारुती (बबलू) शिंदे उपस्थित होते.
