खारपाडा (पेण) | प्रतिनिधी :
रायगड जिल्हा परिषद प्राथमिक उत्कृष्ट शाळा, विंधणे येथील विद्यार्थ्याने पूर्व उच्च प्राथमिक शिष्यवृत्ती (इयत्ता पाचवी) परीक्षेत उल्लेखनीय यश संपादन करत शाळेच्या शिरपेचात मानाचा तुरा रोवला आहे.
सन २०२५-२६ या शैक्षणिक वर्षातील शिष्यवृत्ती परीक्षेत कु. यज्ञ कर्ण पाटील यांनी उत्कृष्ट गुणांसह यश मिळवले. त्यांनी रायगड ग्रामीण विभागात ४१ वा क्रमांक, तर उरण तालुक्यात चौथा क्रमांक पटकावून शाळेचे व परिसराचे नाव उज्ज्वल केले.
या यशामागे वर्गशिक्षक श्री. प्रवीण हरिभाऊ पाटील, मुख्याध्यापिका सौ. स्रग्धरा पाटील, शिष्यवृत्ती मार्गदर्शक श्री. रत्नाकर पाटील यांचे मार्गदर्शन लाभले. तसेच विद्यार्थ्याचे पालक श्री. कर्ण बाळाराम पाटील व सौ. नीलम कर्ण पाटील यांचे प्रोत्साहन आणि शाळेतील सर्व शिक्षकांच्या अथक परिश्रमांमुळे हे यश शक्य झाल्याचे सांगण्यात आले.
कु. यज्ञ कर्ण पाटील यांना शिष्यवृत्ती प्राप्त झाल्याने विंधणे गावासह संपूर्ण परिसरात आनंदाचे वातावरण असून, विविध स्तरांतून त्यांचे आणि मार्गदर्शक शिक्षकांचे अभिनंदन करण्यात येत आहे.
