न्यू इंग्लिश स्कूलमध्ये आरोग्य विभागाचा उपक्रम; स्वच्छता, पौष्टिक आहार व पावसाळ्यातील आजारांबाबत मार्गदर्शन
वीर, दि. १३ ऑगस्ट २०२६ : प्राथमिक आरोग्य केंद्र वहाळ अंतर्गत उपकेंद्र वीर यांच्या वतीने न्यू इंग्लिश स्कूल, वीर येथे किशोरवयीन मुलींसाठी आरोग्यविषयक उपक्रमाचे आयोजन करण्यात आले. या उपक्रमांतर्गत ९ ते १४ वयोगटातील १५ मुलींना त्यांच्या पालकांच्या उपस्थितीत HPV लसीकरण करण्यात आले.
HPV संसर्गापासून भविष्यात संरक्षण मिळावे, तसेच किशोरवयीन मुलींच्या आरोग्याबाबत योग्य वेळी जनजागृती व्हावी, या उद्देशाने हे लसीकरण करण्यात आले. लसीकरणाच्या वेळी आरोग्य विभागाच्या कर्मचाऱ्यांनी पालकांना लसीकरणाचे महत्त्व समजावून सांगितले.
यावेळी वैद्यकीय अधिकारी डॉ. पांडे मॅडम यांनी किशोरवयीन मुलींशी संवाद साधत वैयक्तिक स्वच्छता, मासिक पाळीच्या काळातील स्वच्छता, पौष्टिक व संतुलित आहार तसेच आरोग्याची योग्य काळजी घेण्याबाबत मार्गदर्शन केले. किशोरवय हा शारीरिक व मानसिक विकासाचा महत्त्वाचा टप्पा असून या काळात योग्य आहार, स्वच्छता आणि आरोग्यविषयक सवयी अंगीकारणे गरजेचे असल्याचे त्यांनी सांगितले.
तसेच आरोग्य निरीक्षक कोळेकर सर यांनी पावसाळ्यात घ्यावयाच्या आरोग्यविषयक काळजीबाबत विद्यार्थिनींना माहिती दिली. पावसाळ्यात दूषित पाणी, अस्वच्छ परिसर, डासांची वाढ यामुळे होणारे विविध आजार टाळण्यासाठी परिसर स्वच्छ ठेवणे, पाणी उकळून किंवा शुद्ध करून पिणे, घराच्या व परिसराच्या आसपास पाणी साचू न देणे आदी उपाययोजनांची माहिती देण्यात आली. डेंग्यू, मलेरिया यांसारख्या कीटकजन्य आजारांपासून बचाव करण्यासाठी आवश्यक दक्षता घेण्याचे आवाहनही करण्यात आले.
या आरोग्य उपक्रमास पंचायत समिती सदस्य मा. श्री. संजय जावळे साहेब यांची प्रमुख उपस्थिती लाभली. यावेळी वैद्यकीय अधिकारी डॉ. पांडे मॅडम, आरोग्य निरीक्षक कोळेकर सर, LHV सावंत मॅडम, CHO पायाळ सर, ANM पाटील सिस्टर, MPW जाधव, आशा सेविका पानवलकर तसेच मदतनीस जाधव उपस्थित होते.
न्यू इंग्लिश स्कूल वीर येथील मुख्याध्यापक तसेच सर्व शिक्षकांनी या उपक्रमासाठी मोलाचे सहकार्य केले. पालकांनीही उत्स्फूर्त सहभाग नोंदवत आरोग्य विभागाच्या या उपक्रमाचे कौतुक केले.
किशोरवयीन मुलींच्या आरोग्याचे संरक्षण, योग्य आरोग्यविषयक सवयी आणि आजारांपासून प्रतिबंधात्मक उपाय याबाबत जनजागृती करण्यासाठी अशा उपक्रमांची सातत्याने गरज असल्याचे यावेळी उपस्थित मान्यवरांनी सांगितले.
