पारंपरिक नृत्यांनी संस्कृतीचा जागर
पद्मश्री पुरस्कारप्राप्त आदिवासी कलाकार भिकल्या धिंडा यांच्या प्रतिकृती तसेच हिरवा देवाची पालखी ठरली आकर्षण; ढोल, तारपा, गौरी, तुर नृत्याने जव्हार दुमदुमले
पालघर : सौरभ कामडी
जागतिक आदिवासी दिनानिमित्त जव्हार शहरात रविवारी आदिवासी संस्कृती, परंपरा आणि एकतेचे दर्शन घडविणारी भव्य मिरवणूक काढण्यात आली. युवा आदिवासी संघच्या वतीने आयोजित करण्यात आलेल्या या कार्यक्रमात हजारो आदिवासी बांधव सहभागी झाले. पारंपरिक वेशभूषा, ढोल-ताशे, तारपा, मादोल, संबळ यांसह विविध आदिवासी नृत्यांनी शहरातील वातावरण जल्लोषमय झाले.
दरवर्षीप्रमाणे यंदाही पद्मश्री पुरस्कारप्राप्त आदिवासी कलाकार भिकल्या धिंडा यांच्या प्रतिकृती मिरवणुकीत समावेश करण्यात आला. तसेच आदिवासी समाजाच्या श्रद्धेचे प्रतीक असलेल्या हिरवा देवाच्या पालखीने मिरवणुकीचे विशेष आकर्षण ठरले. ‘आपली संस्कृती, आपला अभिमान’ हा संदेश देत पारंपरिक कला, बोलीभाषा, वेशभूषा आणि लोकवाद्यांचे दर्शन या माध्यमातून घडविण्यात आले.
जागतिक आदिवासी दिनानिमित्त युवा आदिवासी संघाच्या वतीने मिनी मॅरेथॉनसह विविध कार्यक्रमांचे आयोजन करण्यात आले होते. सकाळपासूनच शहरात आदिवासी बांधवांची गर्दी होऊ लागली होती. त्यानंतर चौक-मांगेलवाडा, अंबिका चौक, गांधी चौक, अर्बन बँक-पाचबत्ती चौक, यशवंतनगर, मोर्चा-गोरवाडी मार्गे आदिवासी क्रांतिकारक चौकापर्यंत भव्य मिरवणूक काढण्यात आली.
मिरवणुकीत तारपा नृत्य, ढोल नृत्य, गौरी नाच, मादोल नाच, मोरघा नृत्य, तुर नाच, गवत्या नाच, संबळ आदी पारंपरिक नृत्यांचे सादरीकरण करण्यात आले. पारंपरिक वेशभूषेतील महिला, पुरुष आणि युवकांनी मोठ्या उत्साहाने सहभाग घेतला. आदिवासी गीतांसह डीजेच्या तालावरही तरुणाईने ठेका धरला.
सर्वपक्षीय सहभाग
या कार्यक्रमाला आमदार हरिश्चंद्र भोये, माजी आमदार सुनील भुसारा, युवा आदिवासी संघाचे अध्यक्ष कुणाल सापटा, महिला अध्यक्ष संजना बुदर, महिला कार्याध्यक्ष हेमा राऊत, कार्याध्यक्ष जितेश भोये, सचिव नरेश कुवरा, खजिनदार राहुल घेगड, सर्व आदिवासी समाज सल्लागार यांच्यासह संघटनेचे आजी-माजी अध्यक्ष, कार्याध्यक्ष, उपाध्यक्ष आणि पदाधिकारी उपस्थित होते. माजी जिल्हाध्यक्ष सुरेखा थेतले, माजी जिल्हा परिषद सदस्य गुलाब विनायक राऊत, दिलीप पाटेकर शबरी महामंडळ संचालक, माजी सभापती ज्योती भोये, माजी सभापती विजया लाहारे, जव्हार तालुका सरपंच संघटनेचे अध्यक्ष एकनाथ दरोडा, तालुक्यातील सरपंच-उपसरपंच, माजी जिल्हा परिषद सदस्य, सामाजिक कार्यकर्ते तसेच विविध आदिवासी संघटनांचे पदाधिकारी आणि कार्यकर्ते मोठ्या संख्येने सहभागी झाले.
जागतिक आदिवासी दिनाच्या कार्यक्रमाला विविध राजकीय पक्ष, सामाजिक संस्था, मंडळे आणि संघटनांच्या पदाधिकाऱ्यांनी उपस्थिती लावत आदिवासी बांधवांना शुभेच्छा दिल्या. विविध क्षेत्रांतील मान्यवरांच्या उपस्थितीमुळे कार्यक्रमाला सर्वधर्मसमभाव आणि सामाजिक एकतेचा संदेश मिळाला.
पोलिसांचे सहकार्य
मिरवणूक शांततेत आणि शिस्तबद्ध पद्धतीने पार पडण्यासाठी जव्हार पोलीस ठाण्याचे पोलीस निरीक्षक किरण पवार, डीवायएसपी भारत मेहेर, तसेच पोलीस कर्मचाऱ्यांनी विशेष सहकार्य केले. मोठ्या संख्येने नागरिक सहभागी होऊनही मिरवणूक उत्साहात आणि शांततेत पार पडली.
आदिवासी समाजाची समृद्ध संस्कृती, परंपरा, कला आणि लोकजीवन नव्या पिढीपर्यंत पोहोचविण्यासाठी अशा कार्यक्रमांची गरज असल्याचे यावेळी उपस्थित मान्यवरांनी सांगितले. ‘आपली संस्कृती, आपला अभिमान’ या भावनेतून जव्हारमध्ये जागतिक आदिवासी दिन उत्साहात साजरा करण्यात आला.
