आवाडे येथील दोन तरुण गंभीर, एकाची प्रकृती चिंताजनक दोडामार्ग:प्रतिनिधी
साटेली-भेडशी बाजारपेठेपासून हाकेच्या अंतरावर असलेल्या श्रीकांत केसरकर यांच्या घरासमोर शुक्रवारी रात्री साडेसात च्या सुमारास एका सुसाट मोटारसायकलचा भीषण अपघात झाला. या अपघातात आवाडे येथील दोन तरुण गंभीर जखमी झाले असून, त्यापैकी एकाची प्रकृती अत्यंत चिंताजनक असल्याची माहिती मिळत आहे.प्राप्त माहितीनुसार, दोडामार्गहून साटेली-भेडशीच्या दिशेने येणारी एक मोटारसायकल भरधाव वेगात होती. श्रीकांत केसरकर यांच्या घरासमोर आल्यावर चालकाचे नियंत्रण सुटल्याने ही मोटारसायकल रस्ता लगत घसरत जाऊन जोरदार आदळली असावी, ज्यामुळे हा अपघात घडला.अपघात इतका भीषण होता की, मोटारसायकलवरील दोन्ही तरुण हवेत उडून रस्त्यावर आदळले.
या अपघातात दोघांच्याही डोक्याला आणि शरीराच्या इतर भागांना गंभीर दुखापत झाली आहे. अपघाताचा मोठा आवाज ऐकून स्थानिक ग्रामस्थांनी तातडीने घटनास्थळी धाव घेतली. ग्रामस्थांच्या मदतीने दोन्ही गंभीर जखमी तरुणांना तातडीने उपचारासाठी नजीकच्या रुग्णालयात हलविण्यात आले. तेथून त्यांची प्रकृती चिंताजनक असल्याने त्यांना अधिक उपचारासाठी इतरत्र हलवण्यात आल्याची माहिती समोर आली आहे.या अपघातामुळे साटेली-भेडशी परिसरात हळहळ व्यक्त होत असून, वाढत्या वेगावर आणि अपघातांवर नियंत्रण मिळवण्यासाठी वाहतूक पोलिसांनी कडक कारवाई करावी, अशी मागणी ग्रामस्थांकडून केली जात आहे. या प्रकरणी रात्री उशिरापर्यंत पोलीस ठाण्यात नोंद करण्याचे काम सुरू होते.
