शिराळा प्रतिनिधी:
रिळे (ता. शिराळा) येथील ग्रामपंचायतीच्या मालकीच्या सार्वजनिक जागेबाबत आणि मालमत्तांवरील प्रलंबित तक्रारींवर तातडीने निर्णय न झाल्यास येत्या १५ ऑगस्ट रोजी स्वातंत्र्यदिनी शांततापूर्ण मार्गाने निषेध आंदोलन करण्याचा इशारा रिळे ग्रामस्थांनी प्रशासनाला निवेदनाद्वारे दिला आहे. यासंदर्भातील निवेदन गटविकास अधिकारी (पंचायत समिती, शिराळा), तहसीलदार, पोलीस निरीक्षक व इतर संबंधित अधिकाऱ्यांना सादर करण्यात आले आहे.
सादर केलेल्या निवेदनात ग्रामस्थांनी नमूद केले आहे की, ग्रामपंचायतीच्या सार्वजनिक जागेबाबत अनेक तक्रारी, चौकशी व पत्रव्यवहार होऊनही अद्याप प्रशासनाकडून कोणताही अंतिम कारणासहित आदेश जारी करण्यात आलेला नाही. अनधिकृत नोंदी रद्द करणे, चौकशी अहवालाची अंमलबजावणी करणे आणि सार्वजनिक जागा मूळ उद्देशासाठी उपलब्ध करून देणे यात सातत्याने विलंब होत आहे. ग्रामसभेत प्रत्यक्ष चर्चा होऊनही इतिवृत्तात नोंदी न घेतल्याचा आरोपही ग्रामस्थांनी केला असून, यासंदर्भातील व्हिडिओ पुरावे उपलब्ध असल्याचे निवेदनात म्हटले आहे.
राष्ट्रीय ध्वजाचा पूर्ण सन्मान राखून आंदोलन
स्वातंत्र्यदिनाचे गांभीर्य आणि राष्ट्रीय ध्वजाचा सर्वोच्च सन्मान राखूनच हे आंदोलन केले जाईल, असे ग्रामस्थांनी स्पष्ट केले आहे. अधिकृत ध्वजारोहण कार्यक्रमात कोणताही अडथळा आणला जाणार नसून, ध्वजारोहणानंतर ग्रामपंचायत कार्यालयासमोर संविधानाच्या चौकटीत राहून शांततापूर्ण मार्गाने निषेध नोंदवला जाईल. तसेच, गावातील सामाजिक सलोखा आणि स्वातंत्र्यदिनाचे औचित्य राखून यंदाचे ध्वजारोहण गावातील माजी सैनिक, स्वातंत्र्यसैनिकांचे वारस, आदर्श शिक्षक किंवा प्रगतशील शेतकरी यांसारख्या सर्वमान्य प्रतिष्ठित व्यक्तीच्या हस्ते करण्यात यावे, अशी मागणीही करण्यात आली आहे.
ग्रामस्थांच्या प्रमुख मागण्या:
- सार्वजनिक मालमत्तेबाबत तातडीने कारणासहित अंतिम आदेश काढण्यात यावा.
- अनधिकृत नोंदी रद्द करून जागा पूर्ववत ग्रामपंचायतीच्या नावावर करण्यात यावी.
- सक्षम प्राधिकरणामार्फत जागेची अधिकृत मोजणी व हद्द निश्चिती करण्यात यावी.
- सार्वजनिक शौचालय व इतर आवश्यक नागरी सुविधा मूळ उद्देशानुसार विकसित कराव्यात.
- चौकशी अहवालाची अंमलबजावणी करून दोषींवर कायदेशीर कारवाई करण्यात यावी व त्याचा अहवाल ग्रामस्थांना मिळावा.
प्रशासनाने तातडीने या बाबींची दखल न घेतल्यास भविष्यात अधिक व्यापक व लोकशाही मार्गाने आंदोलन उभारण्याचा इशारा समस्त रिळे ग्रामस्थांनी दिला आहे.
