शैक्षणिक गुणवत्ता वृद्धीसाठी विविध उपक्रमांवर मार्गदर्शन; सेवानिवृत्त व स्थानांतरित शिक्षकांचा सपत्नीक सत्कार
नितेश गट्टीवार
चामोर्शी (प्रतिनिधी):
पंचायत समिती चामोर्शी अंतर्गत तळोधी (मो.) केंद्रातील जिल्हा परिषद प्राथमिक शाळा, रावणपल्ली येथे शैक्षणिक सत्र २०२६-२७ मधील पहिली शिक्षण परिषद उत्साहपूर्ण वातावरणात पार पडली. शिक्षणाची गुणवत्ता उंचावणे, नाविन्यपूर्ण शैक्षणिक उपक्रमांची प्रभावी अंमलबजावणी करणे तसेच नवीन शैक्षणिक धोरणे आणि अध्यापन पद्धतींची माहिती शिक्षकांपर्यंत पोहोचविणे हा परिषदेचा प्रमुख उद्देश होता.
परिषदेचे उद्घाटन तळोधी (मो.) केंद्राचे केंद्रप्रमुख विनोद खोब्रागडे यांच्या हस्ते झाले. अध्यक्षस्थानी केंद्रशाळेचे मुख्याध्यापक वसंत सहारे होते. प्रमुख अतिथी म्हणून मुरमुरीचे मुख्याध्यापक नरेश जाम्पलवार, भाडभिडीचे मुख्याध्यापक विनोद गंप्पावर, पावीमुरांडा येथील मुख्याध्यापक नितीन कुंभारे, तसेच आदर्श शिक्षक किशोर कोहळे यांची प्रमुख उपस्थिती लाभली.
परिषदेत विविध विषयांवर तज्ज्ञ मार्गदर्शन करण्यात आले. पुष्पा मेश्राम यांनी मूल्यवर्धन कार्यक्रम, राज मेश्राम यांनी गणित-विज्ञान अध्ययन समृद्धी कार्यक्रम, तर नरेश जाम्पलवार यांनी महाडीबीटी पोर्टल संदर्भात सविस्तर माहिती देऊन शिक्षकांच्या शंकांचे निरसन केले.
परिषदेच्या समारोपानंतर सेवानिवृत्त शिक्षक ढिवरूजी दुधबळे व संध्या रक्षणवार, तसेच केंद्रातून स्थानांतरित झालेले शिक्षक एकनाथ नरोटे, सुनील सातपुते आणि ऋषीदेव कुनघाडकर यांचा केंद्राच्या वतीने सपत्नीक शाल, श्रीफळ व स्मृतिचिन्ह देऊन भावपूर्ण सत्कार करण्यात आला.
कार्यक्रमाचे सूत्रसंचालन राजू सोनटक्के यांनी केले. परिषद यशस्वी पार पाडण्यासाठी केंद्रातील सर्व शिक्षक-शिक्षिका यांनी सक्रिय सहकार्य केले. शिक्षण क्षेत्रातील गुणवत्तावृद्धीसाठी अशा परिषदांचे महत्त्व अनन्यसाधारण असल्याचे मत उपस्थितांनी व्यक्त केले.
