वहाळ : प्रतिनिधी
दि. २४ जुलै २०२६ रोजी आयुष्मान आरोग्य मंदिर वहाळ अंतर्गत आयुष्मान आरोग्य मंदिर, वीर येथे ‘माझं गाव, आरोग्य संपन्न गाव’ उपक्रमांतर्गत मुख्यमंत्री जनआरोग्य शिबिराचे आयोजन करण्यात आले. शिबिराचे उद्घाटन पंचायत समिती सदस्य मा. श्री. संजय जावळे यांच्या हस्ते करण्यात आले.
या शिबिरामध्ये ग्रामस्थांची विविध प्रकारच्या संसर्गजन्य व असंसर्गजन्य आजारांची तपासणी करण्यात आली. तसेच हिमोग्लोबिन तपासणी करून ग्रामस्थांना आरोग्यविषयक समुपदेशन करण्यात आले. पावसाळ्याच्या काळात नागरिकांनी घ्यावयाची खबरदारी, स्वच्छता आणि आजारांपासून बचाव करण्याच्या उपाययोजनांबाबतही मार्गदर्शन करण्यात आले.
यावेळी अंगणवाडी सेविकांच्या माध्यमातून आहार प्रदर्शन सादर करण्यात आले. संतुलित आहार, पोषण आणि आरोग्य याबाबत ग्रामस्थांना माहिती देण्यात आली.
शिबिरास पंचायत समिती सदस्य मा. श्री. संजय जावळे, वैद्यकीय अधिकारी नीरजा यादव, आरोग्य निरीक्षक मोहोड, वालावलकर हॉस्पिटलचे डॉक्टर व कर्मचारी, गटप्रवर्तक पूजा सकपाळ, समुदाय आरोग्य अधिकारी पायाळ, आरोग्य सेविका पाटील सिस्टर, आरोग्य सेवक कुलदीप पवार, अनिकेत जाधव, आशा सेविका, अंगणवाडी सेविका व मदतनीस तसेच मोठ्या संख्येने ग्रामस्थ उपस्थित होते.
या आरोग्य शिबिरामुळे ग्रामस्थांना विविध आरोग्य तपासण्या व मार्गदर्शन एकाच ठिकाणी मिळाल्याने नागरिकांनी समाधान व्यक्त केले.
