पुणे : प्रतिनिधी
पुणे महानगरपालिकेतील (PMC) बनावट भरतीच्या नावाखाली बेरोजगार तरुणांची कोट्यवधी रुपयांची फसवणूक केल्याचा प्रकार समोर आला असून, या प्रकरणामुळे पुण्यात खळबळ उडाली आहे. पालिकेत कायमस्वरूपी सरकारी नोकरी लावून देण्याचे आमिष दाखवत मोठ्या रॅकेटच्या माध्यमातून शेकडो तरुणांकडून लाखो रुपये उकळल्याचा आरोप आहे.
या प्रकरणी पुण्यातील शिवाजीनगर, भारती विद्यापीठ आणि पर्वती पोलीस ठाण्यांमध्ये एफआयआर दाखल करण्यात आले आहेत. प्रकरणाशी संबंधित राजेंद्र बबन खेडेकर, नमिता बनसोडे, संजय भालेराव, आनंद लोंढे, शिवानंद पाटील, अमित देशपांडे, अमित दारवटकर यांच्यासह इतर आरोपींविरुद्ध गुन्हे दाखल करण्यात आल्याची माहिती आहे.
याप्रकरणातील शिवानंद पाटील, अमित देशपांडे आणि अमित दारवटकर यांना अटक करण्यात आली असून राजेंद्र बबन खेडेकर आणि नमिता बनसोडे हे फरार असल्याचे सांगण्यात आले आहे.
बनावट कागदपत्रांचा वापर
फसवणुकीसाठी आरोपींनी पुणे महानगरपालिकेचा बनावट लोगो, लेटरहेड, ओळखपत्रे, वेतन पावत्या, विभागाचे बनावट शिक्के तसेच वरिष्ठ पालिका अधिकाऱ्यांच्या बनावट सह्या वापरल्याचे तपासात समोर आल्याचे सांगण्यात येत आहे. त्यामुळे संबंधित उमेदवारांना आपली निवड पालिकेच्या नोकरीसाठी झाल्याचा विश्वास निर्माण केला जात होता.
पदानुसार लाखोंची मागणी
आरोपींकडून लिपिक आणि शिपाई पदांपासून कनिष्ठ व वरिष्ठ अभियंता तसेच उपआयुक्त पदांपर्यंत विविध पदांचे आमिष दाखवण्यात आल्याचा आरोप आहे. पदानुसार प्रत्येक उमेदवाराकडून ₹१५ लाख ते ₹४५ लाखांपर्यंत रक्कम घेतल्याचे समोर आले आहे.
या प्रकरणातील फसवणुकीची व्याप्ती, आर्थिक व्यवहार, आणखी किती तरुणांची फसवणूक झाली आणि या रॅकेटमध्ये आणखी कोणाचा सहभाग आहे, याचा तपास पोलिसांकडून सुरू आहे. फरार आरोपींचा शोध घेण्यासाठीही पोलिसांकडून प्रयत्न सुरू आहेत.
