🎙️ दहावीनंतर वेगळी वाट निवडणाऱ्या रेवण गवसचा प्रेरणादायी प्रवास; ‘बालजगत’मधून उलगडणार यशाची कहाणी

रत्नागिरी | प्रतिनिधी
पारंपरिक शिक्षणाचा मार्ग न निवडता स्वतःच्या आवडीच्या क्षेत्रात करिअर घडवण्याचा धाडसी निर्णय घेणाऱ्या सिंधुदुर्ग जिल्ह्यातील सावंतवाडी येथील रेवण गवस यांचा प्रेरणादायी प्रवास आकाशवाणी रत्नागिरी केंद्राच्या ‘बालजगत’ या कार्यक्रमातून श्रोत्यांसमोर येणार आहे. हा विशेष संवाद रविवार, २ ऑगस्ट २०२६ रोजी सकाळी ९.३० वाजता प्रसारित होणार आहे.
लहानपणापासूनच संशोधनाची आवड आणि नवनवीन प्रयोग करण्याची जिज्ञासा असलेल्या रेवण गवस यांना त्यांच्या वडील जयवंत गवस आणि आई यांचे सातत्याने प्रोत्साहन लाभले. याच पाठबळावर त्यांनी अल्पवयातच लिथियम बॅटरी आणि इलेक्ट्रिक वाहन (Electric Vehicles) या उदयोन्मुख क्षेत्राचा सखोल अभ्यास सुरू केला.

इंटरनेटचा सकारात्मक आणि अभ्यासपूर्ण वापर करत देश-विदेशातील संशोधकांचे मार्गदर्शन, संशोधन आणि तांत्रिक माहिती आत्मसात करून त्यांनी स्वतःचे ज्ञान अधिक समृद्ध केले. दहावीनंतर पारंपरिक शिक्षणाचा मार्ग स्वीकारण्याऐवजी इलेक्ट्रिक वाहन तंत्रज्ञान क्षेत्रात करिअर घडवण्याचा निर्णय घेत त्यांनी स्वतःची वेगळी ओळख निर्माण करण्यास सुरुवात केली आहे.
भविष्यात आपल्या गावात इलेक्ट्रिक वाहनांसंदर्भातील प्रशिक्षण केंद्र सुरू करण्याबरोबरच लिथियम बॅटरी उद्योग उभारण्याचे त्यांचे स्वप्न असून त्या दिशेने ते सातत्याने प्रयत्नशील आहेत.

‘मळलेल्या वाटेवरून न जाता स्वतःचा राजमार्ग शोधण्याची धडपड’ या संकल्पनेवर आधारित रेवण गवस आणि त्यांचे वडील जयवंत गवस यांच्याशी सोनाली सावंत यांनी साधलेला प्रेरणादायी संवाद या कार्यक्रमात ऐकायला मिळणार आहे. कार्यक्रमाचे सादरकर्ते विवेक वानखडे आहेत.
हा कार्यक्रम मध्यम लहरी 1143 kHz, एफएम 101.5 MHz, News On AIR मोबाईल ॲपवर थेट ऐकता येणार असून प्रसारणानंतर AIR Ratnagiri च्या अधिकृत YouTube चॅनेलवरही उपलब्ध होणार आहे.