पुरंदर | प्रतिनिधी :
सार्वजनिक गणेशोत्सव २०२६ तसेच दहीहंडी उत्सव २०२६च्या अनुषंगाने सासवड पोलीस ठाण्याच्या हद्दीतील गणेश मंडळे, दहीहंडी आयोजक, पोलीस पाटील, महिला दक्षता समिती, सामाजिक कार्यकर्ते व पत्रकारांची आढावा बैठक सासवड नगरपालिका सभागृहात पार पडली.
उपविभागीय पोलीस अधिकारी, भोर उपविभाग श्री. राजेंद्रसिंह गौर यांच्या मार्गदर्शनाखाली झालेल्या या बैठकीत गणेशोत्सव व दहीहंडी उत्सव शांततेत, सुरक्षित आणि शिस्तबद्ध पद्धतीने साजरा करण्याबाबत मार्गदर्शन करण्यात आले.
यावेळी गणेशोत्सवात सामाजिक व विधायक उपक्रमांना प्राधान्य देण्याचे आवाहन करण्यात आले. पारंपरिक वाद्यांना प्रोत्साहन देत ध्वनिप्रदूषणाच्या नियमांचे पालन करावे. ध्वनिक्षेपक व डीजेच्या आवाजाची निर्धारित मर्यादा ओलांडल्यास नियमानुसार कारवाई करण्यात येईल, असा इशारा पोलिसांकडून देण्यात आला. तसेच गणेश विसर्जन मिरवणुका रात्री १२ वाजण्यापूर्वी पूर्ण करण्यासाठी सर्व गणेश मंडळांनी सहकार्य करावे, असे आवाहन करण्यात आले.
पोलीस निरीक्षक संतोष घोळवे यांनी पुरंदरची ओळख असलेल्या अंजीर व सीताफळाप्रमाणे गणेशोत्सवातही आगळावेगळा सामाजिक संदेश देणारा उपक्रम राबवावा, असे सांगितले. ‘डीजे मुक्त मिरवणूक आणि पारंपरिक वाद्यांसह गणेशोत्सव’ साजरा करून पुरंदरची वेगळी ओळख निर्माण करण्याचे आवाहन त्यांनी केले.
बैठकीदरम्यान गणेश मंडळांच्या पदाधिकाऱ्यांनी विविध सूचना मांडल्या. पत्रकार हेमंत ताकवले यांनीही आपल्या मनोगतातून काही महत्त्वाच्या सूचना केल्या.
बैठकीस सासवड नगरपालिका मुख्याधिकारी डॉ. कैलास चव्हाण, नायब तहसीलदार संदीप पाटील, महावितरणचे अभियंता, सासवड नगरपालिकेचे उपनगराध्यक्ष, विविध गणेश मंडळांचे पदाधिकारी, दहीहंडी आयोजक, पोलीस पाटील, पत्रकार तसेच सामाजिक कार्यकर्ते मोठ्या संख्येने उपस्थित होते.
बैठकीचे नियोजन पोलीस निरीक्षक संतोष घोळवे यांच्या मार्गदर्शनाखाली गोपनीय विभागातील रुपेश भगत यांनी केले.
