माहूर | प्रतिनिधी
श्री क्षेत्र माहूर येथे दि. २७ ऑगस्ट २०२६ पासून श्रीदत्त पंचकोशी परिक्रमेचे आयोजन करण्यात आले आहे. सुमारे २५ किलोमीटरच्या या पवित्र परिक्रमेच्या माध्यमातून भाविकांना धार्मिक व आध्यात्मिक अनुभूती घेता येणार आहे.
परिक्रमा यशस्वीरीत्या पार पाडण्यासाठी माहूर देवस्थानचे पीठाधीश्वर संत महाराज यांच्या आदेशानुसार दत्तशिखर देवस्थानच्या माध्यमातून नियुक्त शिवाधिकारी व भक्त परिवारांकडून योग्य नियोजन करण्यात आले आहे. परिक्रमेच्या मार्गावर भाविकांना कोणत्याही प्रकारचा त्रास किंवा अडचण निर्माण होऊ नये, यासाठी विशेष दक्षता घेण्यात येत आहे.
परिक्रमेच्या कालावधीत अखंड हरिनाम सप्ताहाचे आयोजन करण्यात आले असून भाविकांसाठी अन्नदान व महाप्रसादाचीही व्यवस्था करण्यात आली आहे. त्यामुळे दूरवरून येणाऱ्या भाविकांसह साधुसंत व भक्तांना आवश्यक सुविधा उपलब्ध करून देण्याचा प्रयत्न आयोजकांकडून करण्यात येणार आहे.
श्रीदत्त पंचकोशी परिक्रमेच्या निमित्ताने माहूर परिसरात भक्तिमय वातावरण निर्माण झाले असून, मोठ्या संख्येने भाविक सहभागी होण्याची अपेक्षा व्यक्त करण्यात येत आहे. परिक्रमा शांततेत व सुव्यवस्थित पार पडावी यासाठी देवस्थान व भक्त परिवारांकडून विविध व्यवस्था करण्यात आल्या आहेत.
