अमळनेर | प्रतिनिधी
पैगंबर हजरत मोहम्मद साहेब यांच्या जन्मदिनानिमित्त साजऱ्या होणाऱ्या ईद मिलादुन्नबीच्या पार्श्वभूमीवर बुधवारी अमळनेर शहरात भव्य जुलूस काढण्यात आला. या जुलूसमध्ये मुस्लिम समाजातील हजारो नागरिकांनी उत्स्फूर्त सहभाग घेतला. लहान मुलांपासून ज्येष्ठ नागरिकांपर्यंत विविध वयोगटातील नागरिक मोठ्या संख्येने सहभागी झाले होते.
दुपारी २ वाजेनंतर शहरातील विविध भागांतून जुलूस निघण्यास सुरुवात झाली. कसाली मोहल्ला, शाहआलम नगर, इस्लामपुरा, झामी चौक, पान खिडकी, अंदरपुरा, बाहरपुरा, गांधलीपुरा, जापान जिन, श्रद्धानगर, जोशीपुरा, मिल चाल, तांबेपुरा यासह विविध परिसरातील नागरिक जुलूसमध्ये सहभागी झाले.
जुलूसमध्ये सहभागी नागरिकांच्या हातात इस्लामी झेंडे होते. नात-ए-पाकचे पठण करत पैगंबर हजरत मोहम्मद साहेब यांच्याप्रती श्रद्धा व्यक्त करण्यात आली. जुलूसाच्या मार्गावर उत्साहपूर्ण आणि भक्तिमय वातावरण पाहायला मिळाले.
ईदगाह मैदानावर असरची नमाज
सायंकाळी सुमारे ५ वाजता जुलूस ईदगाह मैदानावर पोहोचला. याठिकाणी समाजबांधवांनी एकत्र येत असरची नमाज अदा केली. जुलूसाच्या पार्श्वभूमीवर शहरातील शांतता व सुव्यवस्था कायम राहावी यासाठी पोलीस प्रशासनाकडून चोख बंदोबस्त ठेवण्यात आला होता.
मस्जिदी व परिसरांची आकर्षक सजावट
ईद मिलादुन्नबीच्या निमित्ताने शहरात गेल्या चार-पाच दिवसांपासून विविध तयारी सुरू होती. शहरातील अनेक मस्जिदी तसेच मोहल्ल्यांमध्ये आकर्षक विद्युत रोषणाई करण्यात आली होती. रात्रीच्या वेळी रोषणाईने सजलेली धार्मिक स्थळे आणि परिसर नागरिकांचे लक्ष वेधून घेत होते.
जयनील फाउंडेशनतर्फे पाण्याच्या बाटल्यांचे वाटप
जुलूसमध्ये सहभागी नागरिकांसाठी सामाजिक बांधिलकीचे दर्शनही घडले. पाच कंदील चौक येथे जयनील फाउंडेशनच्या वतीने जुलूसमध्ये सहभागी नागरिकांना पाण्याच्या बाटल्यांचे वाटप करण्यात आले. उष्ण वातावरणात पाण्याची व्यवस्था केल्याने सहभागी नागरिकांना दिलासा मिळाला. फाउंडेशनच्या या उपक्रमाचे नागरिकांकडून कौतुक करण्यात आले.
ईद मिलादुन्नबीचा हा जुलूस शांततेत आणि उत्साहपूर्ण वातावरणात पार पडला. आयोजन यशस्वी करण्यासाठी पोलीस प्रशासनासह समाजबांधवांनी सहकार्य केले.
