“शहरातील प्रमुख मार्गांची स्वच्छता”
परभणी/प्रतिनिधी:- रमेश मुलगीर
परभणी जिल्ह्यातील मानवत येथील नगरपालिकेचे मुख्याधिकारी कोमल सावरे मॅडम यांनी घेतला पुढाकार मानवत सफाई कर्मचाऱ्यांनी पुकारलेल्या अचानक संपाच्या पार्श्वभूमीवर शहरात आरोग्याचा प्रश्न निर्माण होऊ नये, यासाठी नगरपालिका प्रशासन स्वतः कृती मैदानात उतरले आहे. मुख्याधिकारी कोमल सावरे व कर्मचारी यांच्या प्रत्यक्ष मार्गदर्शनाखाली आणि नेतृत्वात आज सकाळपासूनच पालिकेच्या सर्व विभागांचे अधिकारी व कर्मचाऱ्यांनी हातात झाडू घेऊन रस्त्यावर उतरत शहर स्वच्छतेची धडक मोहीम राबवली. प्रशासनाच्या या तत्परतेमुळे नागरिकांमधून कौतुकाचा वर्षाव होत आहे.
सफाई कर्मचाऱ्यांच्या संपामुळे शहरातील मुख्य चौक, बाजारपेठ आणि मुख्य रस्त्यांवर कचऱ्याचे साम्राज्य निर्माण होण्याची भीती व्यक्त केली जात होती. मात्र, नागरिकांची गैरसोय होऊ नये आणि शहराचे आरोग्य धोक्यात येऊ नये, यासाठी मुख्याधिकारी कोमल सावरे यांनी तातडीने पालिकेच्या सर्व विभागांची आपत्कालीन बैठक बोलावली. केवळ आदेश न देता त्यांनी स्वतः रस्त्यावर उतरून पुढाकार घेण्याचा निर्णय घेतला.
आज भल्या पहाटेपासूनच मुख्याधिकाऱ्यांसोबत प्रशासकीय अधिकारी, लिपीक, अभियंता आणि इतर कर्मचाऱ्यांनी शहरातील प्रमुख रस्ते, मुख्य चौक आणि सार्वजनिक ठिकाणी स्वच्छता मोहीम राबवली. स्वतः मुख्याधिकाऱ्यांनी हातात झाडू घेऊन कचरा उचलल्याने कर्मचाऱ्यांमध्येही मोठा उत्साह दिसून आला. काही तासांतच शहरातील मुख्य रस्ते चकाचक करण्यात आले.
प्रशासनाने दाखवलेली ही सामाजिक बांधिलकी आणि कर्तव्यदक्षता अत्यंत कौतुकास्पद आहे. ऐन संपाच्या काळातही शहराप्रती असलेली निष्ठा सिद्ध करत प्रशासनाने नागरिकांना मोठा दिलासा दिला आहे. या धाडसी आणि कौतुकास्पद कार्याबद्दल शहरवासीयांच्या वतीने नगरपालिका प्रशासन आणि मुख्याधिकारी कोमल सावरे मॅडम यांचे मनःपूर्वक आभार व्यक्त केले जात आहेत.
