प्रतिनिधी : सुगत उराडे
दि. ३१ ऑगस्ट २०२६ :
“ज्ञानाची मशाल हातात घेऊन पुढे जाणारा विद्यार्थीच आपल्या समाजाच्या प्रगतीचा खरा शिल्पकार ठरतो,”
गडचिरोली:अनुदानित आश्रम शाळा, ता. जि. गडचिरोली येथे आदिवासी विद्यार्थी संघटनेच्या वतीने विद्यार्थ्यांसाठी विशेष शिक्षण व अभ्यास मार्गदर्शन शिबिराचे आयोजन करण्यात आले.
या शिबिरात आदिवासी विद्यार्थी संघटनेचे जिल्हाध्यक्ष विलास नरोटे यांनी विद्यार्थ्यांना अभ्यासाचे महत्त्व पटवून देत विविध विषयांवर मार्गदर्शन केले. अभ्यास करताना वेळेचे योग्य नियोजन कसे करावे, परीक्षेची तयारी कशी करावी, एकाग्रता कशी वाढवावी तसेच शैक्षणिक क्षेत्रात सातत्य ठेवून यश कसे संपादन करावे, याबाबत त्यांनी विद्यार्थ्यांना मार्गदर्शन केले.
तसेच, आदिवासी विद्यार्थ्यांनी उच्च शिक्षणाची कास धरून स्वतःच्या प्रगतीसोबतच समाजाच्या विकासातही महत्त्वपूर्ण योगदान द्यावे, असे आवाहन विलास नरोटे यांनी केले.
कार्यक्रमाला चांदाळा आश्रम शाळेच्या मुख्याध्यापिका श्रीमती उसेंडी मॅडम यांची प्रमुख उपस्थिती होती. त्यांनीही विद्यार्थ्यांना शिक्षणाचे महत्त्व समजावून सांगत मेहनत, शिस्त आणि सातत्याच्या जोरावर जीवनात मोठे ध्येय गाठण्याचे आवाहन केले.
यावेळी आश्रमशाळेतील सर्व विद्यार्थी मोठ्या संख्येने उपस्थित होते. विद्यार्थ्यांनी मार्गदर्शन सत्रात उत्स्फूर्त सहभाग घेत अत्यंत लक्षपूर्वक विचार ऐकले.
आदिवासी विद्यार्थी संघटना ही आदिवासी विद्यार्थ्यांच्या शैक्षणिक प्रगतीसह त्यांच्या हक्कांसाठी सातत्याने कार्यरत राहणार असून, विद्यार्थ्यांच्या उज्ज्वल भविष्यासाठी अशा प्रकारचे मार्गदर्शन उपक्रम यापुढेही राबविण्यात येतील, असा निर्धार यावेळी व्यक्त करण्यात आला.
स्थळ : चांदाळा अनुदानित आश्रम शाळा, गडचिरोली
मार्गदर्शक : विलास नरोटे, जिल्हाध्यक्ष, आदिवासी विद्यार्थी संघटना
प्रमुख उपस्थिती : श्रीमती उसेंडी, मुख्याध्यापिका, चांदाळा आश्रम शाळा
