शहादा,दि.31
विशेष संक्षिप्त पुनरीक्षण (SIR) मोहीम यशस्वीरीत्या पार पडल्यानंतर आज, दि. 31 ऑगस्ट रोजी शहादा-तळोदा विधानसभा मतदारसंघाची प्रारूप मतदार यादी अधिकृतपणे प्रसिद्ध करण्यात आली आहे. या मोहिमेबाबत सविस्तर माहिती देण्यासाठी तहसीलदार संभाजीराव पाटील यांनी पत्रकार परिषदेचे आयोजन केले होते. या पत्रकार परिषदेस नायब तहसीलदार रतनसिंग राजपूत आणि शैलेंद्र गवते हे प्रमुख उपस्थित होते.
पत्रकार परिषदेत बोलताना तहसीलदार संभाजीराव पाटील यांनी सांगितले की, 24 ऑगस्ट रोजी मतदान केंद्रांचे सुलभीकरण (रॅशनलायझिंग) करण्यात आले. शहादा-तळोदा विधानसभा मतदारसंघात पूर्वी एकूण 366 मतदान केंद्र होती. मात्र, केंद्र क्रमांक 150 (पुरुषोत्तम नगर) हे 151 क्रमांकाच्या केंद्रात विलीन करण्यात आल्यामुळे आता एकूण मतदान केंद्रांची संख्या 365 झाली आहे.विशेष संक्षिप्त पुनरीक्षणापूर्वी मतदारसंघात 357096 एकूण मतदार नोंदणीकृत होते. मात्र, व्यापक तपासणीनंतर दुबार, मृत, स्थलांतरित आणि गैरहजर आढळलेल्या मतदारांची नावे यादीतून वगळण्यात आली आहेत. यामुळे एकूण 53 हजार मतदार कमी झाले असून, सध्या मतदारसंघातील एकूण मतदार संख्या 304549 वर आली आहे.
यामध्ये आता शहादा तालुक्यातील 191982 तर तळोदा तालुक्यातील 112567 मतदारांचा समावेश आहे.वगळण्यात आलेल्या मतदारांत मृत मतदार14481, स्थलांतरित मतदार 20902, गैरहजर मतदार 7553,दुबार नोंदी 9370 आहेत.प्रारूप मतदार यादी प्रसिद्ध झाल्यानंतर आता नवीन मतदार नोंदणी आणि दुरुस्तीची प्रक्रिया सुरू झाली आहे. 31 ऑगस्ट ते 30 सप्टेंबर या कालावधीत पात्र नागरिकांना नवीन मतदार नोंदणी करता येईल. तसेच 31 ऑगस्ट ते 29 ऑक्टोबर दरम्यान प्राप्त अर्जांवर अपील व सुनावणीची प्रक्रिया पार पडेल. सर्व दावे आणि हरकतींचा निपटारा केल्यानंतर दि. 4 नोव्हेंबर रोजी अंतिम मतदार यादी प्रसिद्ध केली जाईल, अशी माहिती प्रशासनातर्फे देण्यात आली.नागरिकांनी आपली नावे तपासून घ्यावीत आणि आवश्यक सुधारणा वेळेत करून घ्याव्यात, असे आवाहन तहसीलदार संभाजीराव पाटील यांनी केले आहे.
