शहादा,दि.01
शहादा शहरातील वृंदावन नगर परिसरातील पाणी टाकीजवळील मोकळी जागा अनेक दिवसांपासून दुर्लक्षित आणि पडक्या अवस्थेत पडलेली होती. या जागेचा योग्य वापर करून परिसराचे सौंदर्य वाढवण्यासाठी आणि लहान मुलांना खेळण्यासाठी एक उत्तम जागा निर्माण करण्याचा एक अत्यंत स्तुत्य आणि आगळावेगळा उपक्रम राबवण्यात आला आहे.
पालिकेचे माजी गटप्रमुख प्रा. मकरंद पाटील यांच्या वाढदिवसाचे औचित्य साधून स्थानिक नगरसेवक ,लोकप्रतिनिधी आणि समाजसेवकांनी एकत्र येत या जागेचा कायापालट करण्याचा संकल्प केला. उपनगराध्यक्ष सौ. माधवीताई पाटील, बांधकाम सभापती संतोषभाऊ वाल्हे, ड्रीम सिटीचे निलेशभाई पाटील, माय टूर्स प्लॅनचे संचालक अंकुरभाई पाटील, रवीभाऊ राजपूत आणि भा. ज. पा. नगरसेवक यांनी ही पडकी जागा दत्तक घेतली. सर्व मान्यवरांनी लोकसहभाग आणि स्वखर्चातून अत्यंत नियोजनबद्ध पद्धतीने काम करत अवघ्या दोन दिवसांत या जागेचा पूर्ण चेहरामोहरा बदलून टाकला. या ठिकाणी लहान मुलांसाठी सुरेख आणि आकर्षित करणारे ‘मिनी गार्डन’ विकसित करण्यात आले आहे.
मुलांच्या खेळाची साधने, हिरवळ आणि बसण्यासाठी योग्य व्यवस्था करून या जागेचे रूपांतर एका सुंदर उद्यानात करण्यात आले.या नवनिर्मित मिनी गार्डनचे लोकार्पण परिसराचे नेते दीपकभाई पाटील, माजी जिल्हा परिषद शिक्षण सभापती जयश्रीबेन दीपक पाटील, प्रा. मकरंद पाटील, उपनगराध्यक्ष सौ. माधवी मकरंद पाटील यांच्या हस्ते आणि प्रमुख मान्यवरांच्या विशेष उपस्थितीत मोठ्या उत्साहात पार पडले. वाढदिवसानिमित्त कोणतीही उधळपट्टी न करता, समाजातील लहान मुलांसाठी आणि परिसरातील नागरिकांसाठी अत्यंत उपयुक्त ठरेल असा हा उपक्रम राबवल्याबद्दल सर्वच स्तरातून या उपक्रमाचे आणि सर्व आयोजकांचे कौतुक होत असून स्थानिक रहिवाशांनी मनःपूर्वक आभार व्यक्त केले आहेत.
