शहादा,दि.01
तरुणांनी मोबाईलचा अनावश्यक वापर कमी करत मैदानावर जाऊन खेळ खेळावेत, हेच मेजर ध्यानचंद यांना खरे अभिवादन ठरेल, असे प्रतिपादन कनिष्ठ महाविद्यालयाच्या उपप्राचार्या प्रा. कल्पना पटेल यांनी केले.
पूज्य साने गुरुजी विद्या प्रसारक मंडळाच्या कला, विज्ञान व वाणिज्य महाविद्यालयाच्या जिमखाना विभागात हॉकीचे जादूगार मेजर ध्यानचंद यांच्या जयंतीनिमित्त ‘राष्ट्रीय क्रीडा दिवस’ अत्यंत उत्साहात साजरा करण्यात आला, त्यावेळी त्या बोलत होत्या.कार्यक्रमाची सुरुवात उपप्राचार्या प्रा. कल्पना पटेल यांच्या हस्ते मेजर ध्यानचंद यांच्या प्रतिमेस पुष्पहार अर्पण करून झाली. याप्रसंगी उपप्राचार्य प्रा. डॉ. एस. डी. सिंदखेडकर, योगिता पावरा, क्रीडा मंडळाचे अध्यक्ष प्रा. डॉ. महेश जगताप, महाविद्यालयाचे क्रीडा संचालक प्रा. डॉ. अरविंद कांबळे आणि प्रा. डॉ. जितेंद्र माळी यांच्यासह विविध मान्यवर उपस्थित होते.आपल्या मनोगतात उपप्राचार्या प्रा. कल्पना पटेल म्हणाल्या की, खेळ खेळल्याने आपल्या अंगी शिस्त येते, अनुशासन पाळले जाते आणि ठरवलेली ध्येय-उद्दीष्टे वेळेवर पूर्ण करण्याची सवय लागते. दुसऱ्यांबद्दल आदर बाळगणे आणि कोणताही पराभव हा शेवट नसतो, ही महत्त्वाची शिकवण फक्त क्रीडा क्षेत्रातूनच मिळते. त्यानंतर प्रा. डॉ. सिंदखेडकर यांनी खेळाडूंचा खडतर प्रवास कसा असतो आणि त्यावर ते आत्मविश्वासाने कशी मात करतात, याबद्दल विद्यार्थ्यांना सविस्तर मार्गदर्शन केले.या यशस्वी उपक्रमाबद्दल संस्थेचे अध्यक्ष दीपकभाई पाटील, उपाध्यक्ष जगदीशभाई पाटील, समन्वयक प्रा. मकरंद पाटील, संचालक मयूरभाई पाटील, प्राचार्य डॉ. एम. के. पटेल यांनी क्रीडा विभागाचे विशेष कौतुक केले.
कार्यक्रमाचे प्रास्ताविक व सूत्रसंचालन क्रीडा संचालक प्रा. डॉ. अरविंद कांबळे यांनी केले, तर उपस्थितांचे आभार प्रा. डॉ. जितेंद्र माळी यांनी मानले. कार्यक्रम यशस्वी करण्यासाठी प्रा. गोपाल गवई, कार्यालयीन अधीक्षक गोपाळ सोनार, दिलवर ठाकरे, संजय विसावे आणि दुर्गेश पाटील यांनी विशेष परिश्रम घेतले.
